Qazaqstan qazan aıynda munaı óndirisin azaıtady

NUR-SULTAN. QazAqparat – OPEK+ elderi qazan aıynda munaı óndirisin azaıtady. Mundaı sheshim búgin beınekonferentsııa formatynda ótken OPEK+ kelisimine qatysýshy elderdiń mınıstrlik otyrysynda qabyldandy, dep habarlaıdy QazAqparat.

Otyrysqa Qazaqstan atynan Energetıka vıtse-mınıstri Áset Maǵaýov qatysty.

Onlaın-kezdesýde tamyz aıynda elderdiń kelisim boıynsha mindettemelerin oryndaýy talqylandy.

Málim etilgendeı, qazan aıynda munaı óndirisin tamyz aıyndaǵy kórsetkishke qaıtarý sheshimi qabyldandy.

«Otyrys qorytyndysy boıynsha táýligine 0,1 mln barrelge ulǵaıtý tek qyrkúıek aıy úshin ǵana bolǵanyn eskere otyryp, qazan aıyndaǵy óndirý deńgeıin tamyz aıyndaǵy deńgeıde qaldyrý týraly sheshim qabyldandy. Qazaqstannyń qazan aıyndaǵy mindettemeleri táýligine 1,706 mln barreldi quraıdy», - delingen QR Energetıka mınıstrligi baspasóz qyzmetiniń málimetinde.