Qazaqstan qaı elderge taǵam eksporttaıdy
Bul týraly QR Aýyl sharýashylyǵy mınıstri Saparhan Omarov halyqqa esep berý kezdesýinde aıtyp berdi.
"Búginde 13 taýar túri boıynsha Qytaı naryǵy ashyq. ıAǵnı, balyq ónimderi, asyl tuqymdy jylqylar, muzdatylǵan qoı eti, bal, bıdaı, bıdaı kebegi, soıa burshaqtary, soıys jylqylary, raps, sıyr eti, jońyshqa pisheni, un, ósimdik maıy, arpa, júgeri eksporttalady", - dedi mınıstr Qazmedıa ortalyǵynda halyqqa esep berý kezdesýinde.
Al Iran tarapymen tiri qoılardy, muzdatylǵan jáne salqyndatylǵan qoı etin, sıyr etin, jumyrtqa jetkizýge arnalǵan veterınarııalyq talaptar kelisilgen.
"Saýd Arabııasy Koroldigimen soıý jáne ósirý úshin otandyq iri qara mal men usaq mal eksporttaýǵa arnalǵan veterınarııalyq sertıfıkat kelisildi. Bahreınge sıyr eti men qoı etin eksporttaý júzege asyrylýda. Nátıjesinde agroónerkásiptik keshen ónimderin Qytaıǵa eksporttaý 30,4%-ǵa (jalpy eksport - 258,2 mln AQSh dollary), Parsy shyǵanaǵy elderine (Katar, Kýveıt, BAÁ, SAK, Oman, Bahreın) eksporttaý 4,1 esege, Iranǵa eksporttaý 2,1 esege (328,9 mln AQSh dollary), Eýroodaqqa eksporttaý 14,6%-ǵa (303,6 mln AQSh dollary) artty", - deıdi mınıstr.
Jalpy agroónerkásiptik keshen ónimderin eksporttaý kólemi 2018 jyly 24,5%-ǵa ulǵaıǵan.
"Agroónerkásiptik keshen ónimderiniń sheteldik naryqtarǵa qoljetimdiligin arttyrý úshin Izraıl, Túrkııa, Kýveıt, Oman, Japonııa, Ońtústik Koreıa memleketterimen, Eýroodaq elderimen kelissózder júrgizý josparlanyp otyr. Bul rette, Qytaı tarapymen 2018 jyly Qazaqstannan jetkiziletin eksportqa baǵdarlanǵan aýyl sharýashylyǵy ónimderine qoıylatyn ımporttyq talaptardy kelisý jónindegi jol kartasy bekitildi", - dep óz sózin túıindedi S. Omarov.