Qazaqstan qaı elderge astyq eksportyn ulǵaıtady

ASTANA. QazAqparat – Ýkraına astyǵynyń álemdik naryqqa shyqpaı qalýy sebebinen belgili bir shamada bıdaı tapshylyǵy oryn alýy múmkin. Bul týraly Aýyl sharýashylyǵy mınıstrliginen málim etti, dep habarlaıdy QazAqparat tilshisi.

«Elimiz astyǵynyń eksporttyq naryqtarda básekelestigin joǵarylatý úshin turaqty túrde jumys júrgizilýde. Mysaly, Qazaqstannan Aýǵanstanǵa astyq eksportyn ulǵaıtý úshin Ózbekstan aýmaǵy arqyly temir jol kóligimen tranzıttik tasymaldaýǵa tarıftik preferentsııalar alý jumystary júrgizilip jatyr», - dep atap ótedi mınıstrlikten agenttiktiń resmı saýalyna oraı.

Sonymen qatar «Azyq-túlik korporatsııasy» UK» AQ jáne basqa qazaqstandyq eksporttaýshylar Kavkaz aımaǵy elderine, birinshi kezekte Ázerbaıjanǵa astyq jetkizýdi ulǵaıtýdy josparlap otyr.

«Reseı Federatsııasynyń astyq kelisiminen shyǵýy, árıne álemdegi astyq baǵasynyń ósýine alyp keledi. Sebebi, Ýkraına – álemdegi iri astyq óndirýshi jáne eksporttaýshy elderdiń biri. Ýkraına astyǵynyń álemdik naryqqa shyqpaı qalýy belgili bir shamada tapshylyq týdyrýy múmkin», - dedi vedomstvodan.

Buǵan deıin habarlanǵandaı, bıyl Qytaı tarapymen «táýligine bir temir jol quramy» shemasy boıynsha qazaqstandyq astyqty eksporttaý boıynsha kelisim jasaldy.