Qazaqstan kaskaderleri Golıvýdtyń «Kıller kodeksi» fılmine tústi

NUR-SULTAN. QazAqparat – Qazaqstannyń «Nomad Stunts» kaskaderleri tanymal amerıkalyq akter Semıýel L.Djeksonmen birge «Kıller kodeksi» fılmine tústi, dep habarlaıdy QazAqparat tilshisi.

Aıta keteıik, Golıvýdtyń «Kıller kodeksi» fılmi álemdik prokatqa shyqqan bolatyn. Onda basty rólderdi Semıýel Leroı Djekson, Meggı Kıý jáne Maıkl Kıton oınaıdy. Sonymen qatar fılmdi túsirý jumysyna «Nomad Stunts» tobyndaǵy qazaqstandyq kaskaderler de jumyldyrylǵan.

«Jobaǵa jalpy «Nomad Stunts» tobynyń 10 kaskaderi qatysty. Aıta keterligi, kaskaderler ekshnge ǵana jumyldyrylmaı, qıyn epızodtarda basty keıipkerler rólin somdady. Sonymen qatar epızodtyq sahnalarǵa akter retinde de qatysty», - dep jazdy «Nomad Stunts» toby Instagram-daǵy paraqshasynda.

Qazaqstandyq akterler bandıtterdiń, bosqyndar men oqqaǵarlardyń, shekarashylar men beıbit turǵyndardyń rólinde oınady.

Týyndy rejısseri «Roıal kazınosy», «Zorra maskasy», «Jatjurttyq» syndy fılmdermen jumys istegen martın Kempbell boldy. Túsirilim jumystary Rýmynııada ótti.