Qazaqstan kásipkerleri Qorǵanys mınıstrliginiń tapsyrysyn oryndaýdan bas tartty
Nur-Sultan qalasynda Reseıge sanktsııalar paketiniń engizilýi jáne onyń Qazaqstan ekonomıkasyna áserine qatysty «Atameken» ulttyq kásipkerler palatasy qurǵan óńirlik jedel shtabtyń otyrysy ótti. Kásipkerler sanktsııalar saldarynan qandaı problemalar men qaterlerge tap bolǵanyn aıtyp berdi.
Kásipkerler mata-materıaldyń qymbattaýynan jáne valıýta baǵamynyń ósýinen arnaıy kıim, mektep formasyn tigý boıynsha kelisimsharttyq mindettemelerdi oryndaı almaıtynyn bir aýyzdan jetkizdi.
«BMC Sales» basshysy Asqar Basheevtiń aıtýynsha, shıkizatty jetkizýshiler valıýta baǵamynyń qubylýyna baılanysty kelisimshart jasasýdan tartynyp otyr. «Alda mektep naýqany kele jatyr, biz tige almaımyz, oǵan resýrs tapshy. Jetkizýshiler kelisimshart jasaýǵa asyqpaıdy. Óıtkeni erteń baǵa ózgerip ketpesine kepildik joq», – deıdi ol.
«Progress» tigin fabrıkasy» JShS ókili Nurjan Mankın onyń fabrıkasy Qorǵanys mınıstrligimen 2021 jyldyń kúzindegi baǵamen kelisimshart jasaǵanyn aıtty. Al qazir Qytaı jáne Reseıde óndirilgen materıaldyń baǵasy 30-40% qymbattady. «Qazirgi ýaqytta biz kelisimshartty oryndaı almaımyz», – dep atap ótti ol.
Onyń áriptesi, «KazSPO-N» JShS bas dırektory Elena Svechnıkova qazirgi jaǵdaıda Qorǵanys mınıstrligimen josparlanǵan kelisimshart tıimsiz bolǵandyqtan, odan bas tartýǵa májbúr ekendigin aıtty. «Alaıda bizdi isin adal oryndamaıtyn jetkizýshiler reestrine qosady dep ýaıymdaımyz. Bizge osy baǵytta kómek berseńizder?», – dedi kásipker.
Jeńil ónerkásip salasyndaǵy osy máseleni basqa da kompanııalar kóterdi.
Al «Eurasia Group Kazakhstan» JShS ókilderi Eýropa jáne AQSh-tan kelýi tıis aýyl sharýashylyǵy tehnıkasy Belarýs jáne Reseı jaqtan keshigip jatqanyn aıtty. Bul jabdyq olarǵa aldaǵy kóktemgi dala jumystaryn bastaý úshin qajet.
«Egis jumystary bir jarym aıdan soń bastalady. Logıstıka marshrýty boıynsha alańdaýshylyq bar. Eger RF jáne Belarýs óz shekaralaryn japsa, sáıkesinshe búkil taýar aǵyny Túrkııa jáne Ázerbaıjan arqyly tasymaldanady. Baký jáne Aqtaý porttary mundaı júktemege daıyn ba? Bul tehnıkanyń turyp qalýy, kólik keptelisine ákep soǵady. Sonymen qatar jetkizý merzimin de keshiktiremiz. Bizge qazir tranzıt úshin Reseı jáne Balerýs shekarasynyń jabylmaǵany kerek», – dedi kompanııa ókili.
«QR Jıhaz jáne aǵash óńdeý ónerkásibi kásiporyndarynyń qaýymdastyǵy» zańdy tulǵalar birlestiginiń prezıdenti Qanat Ibraev otandyq jıhaz ónerkásibiniń toqtap qalýyna kómektesetin birneshe usynysaıtty.
«Birinshi kezekte, plıtalyq materıaldardy tasymaldaýdy sýbsıdııalaý qajet. Biz buǵan deıin bul usynysty berdik, biraq ol Ekonomıka mınıstrligi men Qarjy mınıstrliginde nazardan tys qaldy. Plıtalyq materıal baǵasyndaǵy eń kóp úlesti, óndirýshi zaýytqa baılanysty, shamamen 40-50% tasymaldaý quraıdy», – dep atap ótti Qanat Ibraev.
Budan ári, onyń pikirinshe, plıtalyq materıal men fýrnıtýrany jetkizýge arnalǵan salyq jeńildikterin ázirleý kerek. Sheteldik jabdyqty jetkizýge arnalǵan preferentsııalarǵa uqsas. Óıtkeni ekeýi de Qazaqstanda óndirilmeıdi. Sondaı-aq aldaǵy 3 jylǵa korporatıvti tabys salyǵyna moratorıı engizý qajet.
«Qazaq stone» Qazaqstan tas óńdeý salasynyń odaǵy» ZTB tóraǵasy Dáýren Aǵzymov odaq jyl boıy Máskeýmen otandyq tasty jetkizýge kelissózder júrgizgenin atap ótti. Alaıda, jaqynda olar eldegi saıası jaǵdaıǵa baılanysty barlyq jumys toqtaǵany týraly habarlama aldy.
«Biz osy jyly jumyssyz qaldyq. Ne isteý keregin bilmeımin...», - dedi ol.
Nur-Sultan qalasy kásipkerler palatasy dırektorynyń mindetin atqarýshy Beısen Jolboldıev aıtylǵan barlyq másele jınalyp, balamaly sheshimderdi izdeý úshin «Atameken» UKP jedel shtabyna jiberiletinin atap ótti.
Aıta keteıik, Reseıge salynǵan sanktsııalar saldarynan bıznesi zardap shekken kásipkerler Nur-Sultan qalasy boıynsha jedel shtabqa habarlasa alady:
8 (7172) 91-90-80
+7 705 707 1482
+7 705 585 5579
+7 702 154 7707
WhatsApp nómir: 87788701432.