Qazaqstan qashan aq qarǵa oranady
«Qazaqstannyń basym bóliginde qar jamylǵysy jeltoqsannyń birinshi onkúndiginiń sońynda, al respýblıkanyń ońtústik-batysynda, ońtústiginde jáne ońtústik-shyǵysynda aıdyń ekinshi jartysynda túsedi dep boljanýda. Jeltoqsan aıynyń basynda Qazaqstannyń basym bóliginde jaýyn-shashyn (jańbyr, qar) jaýady. Sondaı-aq tuman, kóktaıǵaq qubylystary baıqalady dep kútiledi. Al soltústik óńirlerde uıytqyǵan jel men jaıaý burqasyn soǵýy yqtımal», - dep atap ótedi Qazgıdrometten.
Mekeme málimetinshe, jeltoqsannyń 5-i kúninen keıin ońtústik aımaqtardy qospaǵanda eldiń basym bóliginde aıazdy aýa raıy kútiledi. Qar jaýyp, burqasyndy jel kúsheıedi. Termometr baǵany túngi ýaqytta -10-20°S-qa, kúndiz-3-10°S-qa deıin tómendeıdi dep boljanady.
Kúz nege jyly boldy?
Qazaqstan aýmaǵyna tán emes jyly kúz ben qystyń kesh kelýi batys jáne ońtústik tsıklondardyń jıi bolýymen, sondaı-aq Iran men Jerorta teńizi aýdandarynan jyly aýa massalarynyń kelýimen baılanysty. Osyǵan oraı Qazaqstan aýmaǵyndaǵy temperatýralyq fon klımattyq normadan 3-10° S-qa joǵary tirkeldi. Meteobaqylaý tarıhynda osy jyldyń qarasha aıy óte jyly boldy. Jyly aýa-raıynyń joǵarǵy shegi 17-18 qarasha aralyǵynda baıqaldy. Sońǵy ret aýa raıy jyly qarasha aıy 2010 jyly tirkelgen edi. Sol kezde aýa temperatýrasy normadan 2-7° S-qa aýytqydy.
Mundaı qubylys el tarıhynda qashan baıqaldy?
Kópjyldyq baqylaýlarǵa sáıkes, Astana qalasynda qar jamylǵysynyń eń kesh túsýi 1967 jylǵy 15 jeltoqsanda (56 jyl buryn) jáne 2008 jylǵy 14 jeltoqsanda (15 jyl buryn) tirkeldi.
Tarıhı derekterge súıensek, elordada qar jamylǵysynyń erte túsýi – 10 qazan, ortasha túsýi – 10 qarasha, al kesh túsýi 15 jeltoqsanda boldy. Sońǵy úsh jylda – 2020, 2021, 2022 jyldary qarashanyń birinshi onkúndiginiń sońynda, ekinshi onkúndiginiń basynda turaqty qar jamylǵysy tirkelip, ortasha qalyńdyǵy 8-13 sm boldy.