Qazaqstan qarjygerler kongresinde «Tsıfrlyq teńge» jobasy iske qosyldy
Ulttyq valıýtanyń 30 jyldyǵy kúni tsıfrlyq teńgedegi karta boıynsha alǵashqy satyp alýdy Qazaqstannyń Ulttyq tólem korporatsııasynyń tóraǵasy Bınur Jalenov jasady. Tsıfrlyq teńgedegi shottaǵy qarajat lezde dástúrli teńgege aıyrbastaldy jáne álemniń kez kelgen núktesinde kartamen tóleý úshin qoljetimdi boldy.
«Tsıfrlyq teńge - qolma-qol jáne qolma-qol emes aqshadan basqa ulttyq valıýtanyń úshinshi nysany. Ol ınnovatsııalyq qarjy qyzmetterin qurý úshin blokcheın tehnologııasynyń áleýetin ashady, memlekettik shyǵystardyń ataýlylyǵy men tıimdiligin qamtamasyz etedi, sondaı-aq dástúrli qarjy men tsıfrlyq aktıvter álemi arasynda «kópir» salady. Búgin ótkizilgen iske qosý tsıfrlyq teńge ekojúıesin damytýǵa bastama boldy jáne jaqyn arada qazaqstandyqtar onyń negizinde alǵashqy ónimderdi paıdalana alady», - dep atap ótti Qazaqstannyń Ulttyq tólem korporatsııasynyń tóraǵasy Bınur Jalenov.
Aıtýynsha, tsıfrlyq teńge ataýly áleýmettik tólemder, memlekettik satyp alý tıimdiligin arttyrý, transshekaralyq tólemderdi ońtaılandyrý, baǵdarlamalanatyn tólemderdi qurý úshin jańa múmkindikter ashatyn qolma-qol jáne qolma-qol aqshasyz aqshanyń burynnan bar artyqshylyqtaryn biriktiredi. Tsıfrlyq teńgeni úsh kezeńmen engizý 2025 jyldyń sońyna qaraı aıaqtalady dep kútilýde.
«Tsıfrlyq teńge» jobasyna qatysý blokcheın jáne krıptovalıýta tehnologııasyn qoldana otyryp, tutynýshylar men bıznes úshin ınnovatsııalyq ónimderdi iske qosý, tsıfrlyq aktıvter úshin retteýshi negizdi damytý boıynsha múmkindikter ashady jáne tutastaı alǵanda bul eldegi jańa tsıfrlyq ekonomıkany damytýdaǵy úlken qadam. Ulttyq valıýtanyń engizilýiniń 30 jyldyǵyn atap ótetin kúnderi qazaqstandyqtarǵa tsıfrlyq teńgedegi tólem kartasyn usynǵanymyzdyń sımvoldyq máni bar. Bul karta bizdiń klıentterimiz arasynda suranysqa ıe jáne tanymal ónim bolatynyna senimdimiz», – dedi Eýrazııalyq banktiń basqarma tóraǵasy Lázzat Satıeva.
Sarapshylardyń aıtýynsha, tsıfrlyq teńgedegi debettik karta ustaýshylar úshin de, saýda kásiporyndarynyń ıeleri úshin de birqatar mańyzdy artyqshylyqtardy usynady. Karta ustaýshy banktegi tsıfrlyq teńgedegi shotqa qol jetkize alady jáne onymen birge tólemniń taǵy bir tásiline jáne óz qarajatyn basqarýǵa ıkemdilikke qol jetkizedi. Karta ıeleri tsıfrlyq teńgeni oflaın, ınternet-dúkenderde jáne túrli saıttar men qosymshalarda qaýipsiz jumsaı alady. Kartany tutynýshynyń telefonynda, saǵatynda nemese qaltasyndaǵy ámııanynda saqtaýǵa bolady.