Qazaqstan Qarýly Kúshteriniń áskerlerin qorytyndy tekserýdiń birinshi kezeńi aıaqtaldy (FOTO)
QR QK Bas shtabyna qarasty Jaýyngerlik daıarlyq departamenti bul kezeńde udaıy daıarlyq bólimderiniń tekserilgenin atap ótti. Birinshi kezekte negizgi oqytý pánderi boıynsha áskerı qyzmetshilerdiń derbes daıarlyǵy baǵalandy. Sodan keıin jaýyngerlik oqý-jattyǵý tapsyrmalaryn oryndaý barysynda bólimshelerdiń jınaqylyǵy tekserildi, atap aıtsaq, olar - dabyl boıynsha qaýyrt kóterilý, maqsatty aýdandarǵa shyǵý, praktıkalyq atysty oryndaý, taktıkalyq oqý-jattyǵýlaryn, sondaı-aq jaýyngerlik men materıaldyq-tehnıkalyq qamtamasyz etý is-sharalaryn júrgizý. Birinshi kezeńnen keıin ádettegideı ekinshi kezeń bastalady. Qarashanyń 23-i kúni qorytyndy tekserý QR QK qalǵan áskerı bólimderinde ótetin bolady. Qorytyndy tekserýler - jaýyngerlik daıarlyqty nyǵaıtý barysynda armııanyń jyldyq nátıjelerin, tabystaryn sońǵy ret baǵalaý bolyp tabylady. Bul aýqymdy is-shara jyl saıyn Qarýly Kúshterdi tolyq qamtyp, oǵan qatardaǵy jaýyngerden generalǵa deıingi qazaqstandyq armııa jeke quramynyń 100 % qatysady. 2015 jyly qorytyndy tekserý 16 qarasha kúni bastaldy. Osy aıdyń sońyna deıin áskerı qyzmetshiler kásibı turǵyda bilýge mindetti atys daıarlyǵy, áskerı kólikterdi júrgizý, dene daıarlyǵy, memlekettik-quqyqtyq jáne basqa da daıarlyq túrlerinen jáne komandırlik daıarlyqtan normatıvter tapsyrdy. Nátıjeleri boıynsha úzdik quralym, úzdik áskerı bólimder jáne úlgili áskerı qyzmetshi anyqtalatyn bolady. Qorytyndy tekserýlerdiń nátıjeleri elimizde Qarýly Kúshterdiń jaýyngerlik ázirligin jetildirý úshin aldaǵy baǵyttardy aıqyndap, álsiz tustaryn anyqtaýǵa múmkindik beredi.