Qazaqstan Qarýly Kúshteriniń 15 myńnan astam ofıtseri attestattaýdan ótedi

NUR-SULTAN. QazAqparat - Qarýly Kúshterdegi qyzmetin jan-jaqty baǵalaý, ony utymdy paıdalaný men kásibı áleýetin damytý úshin 15 myńnan astam ofıtser qajetti attestattaýdan ótedi, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Ony ótkizý úshin 2021 jyly Qorǵanys mınıstrligi ofıtserler quramyn attestattaýdy uıymdastyrýǵa qatysty usynystar ázirledi. Ol eki kezeńde ótedi.

Alǵashqy kezeńde – birinshi aqpan men birinshi shilde aralyǵynda Bas shtab, Qorǵanys mınıstrligi, QK ásker túrleri bas qolbasshylary basqarmalary, óńirlik qolbasshylyqtar áskerleri men ásker tekteri qolbasshylary basshylyq býynynyń, áskerı bólimder komandırleriniń bilimderi men quzyretteri tekseriledi. Qyzmetine jáne jeke basyna qatysty jaǵymsyz minezdeme alǵan ofıtserler de attestattaýǵa jatady.

Birinshi shildede bastalatyn ekinshi kezeń qalǵan ofıtserlerge qatysty ótkiziledi. Áskerı qyzmetshiler sybaılas jemqorlyqqa qarsy is-qımyl aıasyndaǵy zańnamany bilýine synaq tapsyrady, áskerı qyzmet boıynsha retteýshi qujattardy bilýine tekserýden jáne psıhologııalyq testileýden ótedi.

Komıssııa attestattalýshynyń atqaratyn laýazymdaryna sáıkestigin jáne olardyń ári qaraı qyzmet etý perspektıvasyn aıqyndaıdy.

Attestattaý nátıjeleri boıynsha ár áskerı qyzmetshi kásibı, jeke qasıetteri men áleýetti múmkindikteriniń jan-jaqty jáne obektıvti sıpattamasyn alady. Árbir áskerı qyzmetshini qaı baǵyttarda daıarlaý men qaıta daıarlaý talap etiletinin belgileıdi.

Osylaısha, qyzmeti boıynsha joǵarylatý jáne oqýǵa jiberý maqsatynda ofıtserlerdiń kadrlyq rezervi qalyptastyrylady, anyqtalǵan kemshilikterdi joıý boıynsha usynymdar ázirlenedi.

Qazaqstan Respýblıkasy Qarýly Kúshteriniń ofıtserler quramyn attestattaý 2021 jyldyń qarashasyna deıin jalǵasady.