Qazaqstan kanadalyq aýdıt tájirıbesine qyzyǵýshylyq tanytty

ASTANA. QazAqparat - Astana memlekettik qyzmet habynyń Basqarýshy komıtetiniń tóraǵasy Álıhan Baımenov Kanada Kirister agenttiginiń Aýdıt, baǵalaý jáne táýekelder jónindegi komıssarynyń orynbasary - Aýdıt jónindegi bas atqarýshy dırektory Braıan Fılbınmen kezdesti, dep habarlaıdy QazAqparat.

Taraptar Astana habyna qatysýshy elderdiń memlekettik qyzmetshilerine arnalǵan aýdıt, baǵalaý jáne táýekelderdi basqarý júıesi boıynsha birlesken trenıngter men semınarlar ótkizý múmkindigin talqylady.

«Memlekettik organdardyń aýdıt jáne baǵalaý júıesi - memlekettik basqarý tıimdiligin arttyrýdyń mańyzdy faktory. Bul - aımaq elderinde áli de jetildirýdi qajet etetin baǵyttardyń biri. Osy turǵydan alǵanda, Kanada tájirıbesi úlken qyzyǵýshylyq týdyryp otyr» - dep atap ótti Álıhan Baımenov.

Kanadalyq sheneýnik memlekettik organdardyń jumysyn baǵalaýda adamı resýrstarǵa mán berý kerektigin jetkizdi.

«Memlekettik qurylymdardyń qyzmetin baǵalaýda eń mańyzdysy: birinshiden - táýekelderdi basqarýdy, ekinshiden - adamı resýrstardy basqarýdy baǵalaý. Óıtkeni kez kelgen júıede adamdardyń róli asa mańyzdy. Barlyq ózgeristerdi adamdar júzege asyrady, sondyqtan qyzmetkerlerdi sapaly irikteý jáne basqarý - negizgi faktor», - dedi óz kezeginde Braıan Flınbın.

Taraptar aldaǵy ýaqytta ózara yntymaqtastyqtyń kelesi qadamdaryn aıqyndady.

Qazirgi tańda, Astana habynyń qatysýshy elderiniń quramyna 40 memleket kiredi, solardyń ishinde EYDU, TMD, Kavkaz, Ortalyq Azııa jáne ACEAN elderi de bar.