Qazaqstan-Kanada saýda aınalymy 730 mln dollarǵa jetti - Úkimet

ASTANA. QazAqparat - QR Premer-Mınıstri Álıhan Smaıylov pen Kanada Premer-Mınıstriniń EO jáne Eýropa boıynsha arnaıy ýákili, Kanadanyń Frantsııadaǵy Elshisi Stefan Dıon Qazaqstan-Kanada yntymaqtastyǵyn odan ári nyǵaıtý máselelerin talqylady.

Álıhan Smaıylov eki el arasynda keshendi saýda-ekonomıkalyq áriptestik qarqyndy damyp kele jatqanyn atap ótti. Ótken jyly ózara saýda kólemi 34%-dan astam ósip, shamamen 500 mln dollardy qurady. Bıylǵy 9 aıda bul kórsetkish 730 mln dollarǵa jetti.

Sonymen qatar Qazaqstan ekonomıkasyna tikeleı kanadalyq ınvestıtsııalar kólemi de arta túsýde, bul kórsetkish ótken jyly 385 mln dollardan asty.

«Biz ınvestıtsııalyq yntymaqtastyqty odan ári nyǵaıtý jáne ózara saýda kólemin ulǵaıtý baǵytynda áleýettiń zor ekenin kórip otyrmyz. Qazaqstan ekonomıkanyń túrli sektorlaryndaǵy óz ónimderiniń 45 túrin jetkizý kólemin 255 mln dollarǵa ulǵaıtýǵa daıyn», - dedi Álıhan Smaıylov.

Stefan Dıon, naqtyraq aıtqanda, energetıka sektoryndaǵy yntymaqtastyqty nyǵaıtý perspektıvalaryna, onyń ishinde JEK jáne dekarbonızatsııalaýdy damytý jónindegi iskerlik baılanystardyń keleshektegi jaı-kúıine toqtaldy.

«Bul – Qazaqstan úshin de, álemdik qoǵamdastyq úshin de óte mańyzdy qadam. Osy baǵytta birlesip jumys isteýimiz kerek. Atap aıtqanda, «taza» sýtegine jáne basqa da turaqty otynǵa kóshý qyzyǵýshylyq týdyryp otyr», — dedi Stefan Dıon.

Foto: primeminister.kz