Qazaqstan qalalarynda memlekettik týrızm baǵdarlamasynyń jobasy tanystyrylady
Aıta keteıik, búgin Ádilet mınıstrliginde Zań jobalaý qyzmeti máseleleri jónindegi vedomstvoaralyq komıssııanyń otyrysy ótti. Onda «Qazaqstan Respýblıkasynyń keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly» zań jobasynyń tujyrymdamasy qaraldy.
«Ózderińiz bilesizder, bıyl Elbasy bizge úlken tapsyrma berdi, ıaǵnı 2019 jyldyń qańtaryna deıin memlekettik týrızm baǵdarlamasyn júzege asyrý mindeti júkteldi. Biz qazirgi kezde atalǵan baǵdarlama jobasyna qatysty jumystardy aıaqtaýǵa jaqyndadyq. Aldaǵy aptada Almaty, Astana, Shymkent, Aqtaý jáne Óskemen qalalaryndaǵy týrıstik qaýymdastyqqa osy baǵdarlamanyń tanystyrylymy ótedi. Osy memlekettik baǵdarlamany tolyqtaı engizýge ári iske asyrý úshin tıisti zań kerek. Ókinishke qaraı, búginde bizdiń zańymyz álemdik standarttarǵa saı emes. Osy oraıda búgin qajetti zań jobasynyń tujyrymdamasyn usyndyq», - dep toqtaldy E. Qojaǵapanov.
Onyń paıymynsha, atalǵan zań jobasy bıyldyń sońyna deıin qarastyrylyp, qabyldansa, onda zańnama memlekettik baǵdarlamamen birge kelesi jyldan týrızmdi damytýǵa óz yqpalyn tıgizedi.
«Bul turǵyda vızalyq jáne mıgratsııalyq jeńildikter qamtylady. Ekinshiden, bizde «Kazakh Tourism» ulttyq kompanııasy bar. Osy kompanııa týraly zańnamada eshqandaı sóz joq. Biz jańa zań jobasynda atalǵan kompanııa týraly birqatar qadamdardy eskerdik», - dedi vıtse-mınıstr.