Qazaqstan qalalarynyń Jańa jyl aldyndaǵy kórinisi — fotoreportaj
Elordanyń aýdandyq ákimdikteri qysqy bezendirý jumystaryna shamamen 696,7 mln teńge bóldi.
Astananyń barlyq aýdanynda shyrsha ornatyldy. Uıymdastyrýshylardyń aıtýynsha, bas shyrshanyń bıiktigi 25 metrge jetedi.
Aıta keteıik, Astanada jańajyldyq otshashý bolady.
Bıyl Almaty ákimdigi jańajyldyq bezendirýge 800 mln teńge jumsady.
Qaladaǵy 8 aýdannyń árqaısysynda Aıaz Ata men ertegi keıipkerleriniń sherýi, jármeńkeler, kórmeler, kontsertter men oıyndar uıymdastyrylady.
Jańa jyl qarsańynda Almatyda qoǵamdyq kólikter merekege saı bezendirildi.
Qala kóshelerinde merekelik taqyrypta bezendirilgen 100 avtobýs pen 50 trolleıbýs júre bastady.
Sonymen qatar Almaty metrosynda Jańa jyl atmosferasyn erekshe sezinýge bolady. Jańa jyl qarsańynda metro beketteri men vagondar merekelik jaryqtarmen kómkerilip, ásem dekoratsııalarmen bezendirildi.
Elimizdiń úshinshi megapolıs qalasy Shymkentte jańa jyldyq bezendirýge 80 mln teńge jumsaldy.
— Qarajat qalanyń bes aýdany arasynda teńdeı bólinip, ár aýdan merekelik bezendirýdi uıymdastyrý úshin shamamen 16 mıllıon teńge alady, — dedi Shymkent qalasynyń ákimi Ǵabıt Syzdyqbekov.
Sonymen qatar, ákim Shymkentti bezendirý úshin byltyrǵy jańa jyldyq shyrshalar men basqa da dekoratsııalar paıdalanylatynyn atap ótti, bul qarajatty únemdeýge, shyǵyndardy azaıtýǵa, sonymen qatar qala turǵyndary úshin mereke atmosferasyn saqtaýǵa múmkindik beredi.
Petropavlda bıyl 8 muz qalashyǵy salynatyny aıtyldy. Jańa jyl merekesine oraı kósheler de bezendirilmek. Oblys ortalyǵyn bezendirýge 13,5 mln teńge jumsalady.
Soltústik Qazaqstan oblysy ishki saıasat basqarmasynyń málimetinshe, bıyl ótken jylǵa qaraǵanda muz qalashyqtarynyń sany bireýge artyq bolmaq. Meıramnyń sımvoly — 30 metrlik byltyrǵy shyrsha bas alańǵa ornatylady.
Budan bólek ortalyq alań, Pestroe kóliniń jany, Jeńis saıabaǵy, saparjaı, «Bereke» shaǵyn aýdany, N. Nazarbaev jáne G. Jýkov kósheleriniń qıylysy janyndaǵy alań bezendiriledi.
Aıta keteıik, bıyl Soltústik Qazaqstan oblysy Taıynsha aýdanynda jańa jyl meıramyna úılerin bezendirgen turǵyndar kópshilikti tańǵaldyrdy.
Semeı ákimdigi jańa jyl shyrshasy men túrli is-sharalar uıymdastyrýǵa 30 mln teńge jumsalatynyn habarlady.
Túrkistanda jańa jyldyq bezendirýge bıýdjetten qarjy qarastyrylmaıtyny málimdeldi. Túrkistan qalasynda bıyl úsh jerge shyrsha ornatylady. Bul iske bıýdjetten bir tıynda bólinbeıdi. Bar shyǵyndy demeýshiler kótermek.
Túrkistan qalasy ákimdiginiń baspasóz qyzmeti usynǵan málimetke súıensek, bıyl Túrkistan qalasynda jańa jyldyq shyrsha kerýen-saraı kesheni aýmaǵyna jáne Jeńis saıabaǵyna qoıylady. Al, ákimshilik-iskerlik ortalyqqa bas shyrsha ornatylady.
Eske sala ketsek, byltyr da Túrkistan qalasynda jańa jyldyq bezendirýge bıýdjetten qarjy qaralmaǵan bolatyn.
Aqtaý qalasynda bıyl jańajyldyq bezendirý jumystaryn memlekettik satyp alý konkýrstyq is-sharalary negizinde jeke kásipker «Aktau Print» merdiger mekemesi jeńip alǵan. Kelisimshart somasy — 76 mln teńge.
Bıyl shyrsha teńiz jaǵalaýyndaǵy «Amfıteatr» alańyna jáne 19 A shaǵyn aýdandaǵy Ábish Kekilbaev murajaıynyń aldyna tigiledi.
Taldyqorǵan qalasynyń ákimdigi jańa jyldyq bezendirýge 36 mln teńgege jýyq qarajat bólgen.
Jetisý oblysynyń ortalyǵy Taldyqorǵan qalasyna bıyl jańa shyrshalar alynbaıdy. Esesine qoldanysta bar 3 shyrshaǵa ilinetin shamdar (kýpol) men barlyq bezendirý jumysyna 19 129 230 teńge bólingen.
Jańajyldyq jańa shaǵyn sáýlet nysandaryn jasatýǵa 12 124 000 teńge bólindi. Byltyrdan qalǵan 30 danasyn qalpyna keltirdi. Onyń somasy 4 707 111 teńgege shyqty.
Bezendirý ortalyq alańnan bólek, «Jastar» saıabaǵy men «Bereke» kottedj qalashyǵyna, qala mańyndaǵy Ótenaı men Erkin aýyldyq okrýgterine de júrgiziledi.
Sonymen qatar Aqtóbe qalasynda da Jańa jyl merekesine oraı qalany bezendirýge qarjy bólinbeıtin boldy. Bıyl da burǵan deıingi shyrshalar men áshekeılerdi paıdalanady.
Bas shyrshany jaǵý rásimi, balalarǵa arnalǵan «Ǵajaıypqa toly jańa jyl» jáne estý qabileti shekteýli balalarǵa arnalǵan «Qosh keldiń, Jańa jyly!», onyń ishinde az qamtylǵan otbasylardan shyqqan balalarǵa «Jańa jyl keldi» atty shara ótedi
Qaraǵandy da jańajyldyq bezendirýge eski jáne birneshe jańartylǵan dekoratsııalar da paıdalanylady. Táýelsizdik alańynda bıiktigi 20 metr bolatyn basty shyrsha ornatyldy, sondaı-aq jasyl arýlar Jeńis alańyna jáne S. Seıfýllın atyndaǵy teatrdyń aldyna qoıylady. Shyrshalardyń barlyǵy byltyrǵy jylǵy.
Sonymen qatar Qaraǵandyda 7 muz aıdyny ornatylady, olardyń jalpy aýdany shamamen 12 myń sharshy metrdi quraıdy. Muz aıdyndary syzyqtyq jáne standartty bolady. Olar merekelik shamdarmen bezendiriledi.
Qostanaı ákimdigi jańa jyldyq bezendirýge shamamen 87 mln teńge jumsady. Ol qarjyǵa muz qalashyǵyn salý, kishi arhıtektýralyq pishinder ornatý, sondaı-aq olardy ustaý jáne bólshekteý boıynsha jumystar 2025 jyly oryndalatyn bolady.
Bezendirý jumystary 1 jeltoqsanda bastalyp, 25 jeltoqsanda aıaqtaldy. Jańajyldyq áshekeıler 2025 jyldyń qańtarynda bólshekteledi.
Dástúr bıynsha qala turǵyndaryn bıyl Aıaz ata, Aqshaqar, jyl rámizderi, muz qorshaýynda shanasy bar buǵylardy jaryqtandyrý jáne jaryqtandyrylǵan foto-aımaq bar muz qalashyǵy qýantady.
Bıyl Atyraý qalasynyń 5 ortalyq alańy men kóshelerine jańa jyldyq shyrshalar ornatý josparlandy. Qalany bezendirý jumystaryna 66,9 mln teńge bólindi. Atyraýdyń 5 ortalyq alańdary men kóshelerinde 18 metrlik shyrshalar ornatyldy.
Al Kókshetaýda Jańa jyldy merekeleýge 51 mln teńge bólindi.
Kókshetaý ákimdiginiń baspasóz qyzmetinen habarlaǵandaı, Abylaı han alańyndaǵy muz qalashyǵy bolmaq. Munda, ádettegideı, bıiktigi 22 metr bolatyn negizgi shyrsha ornatylady.
Eske sala ketsek, byltyr Kókshetaýdyń shyrshasyn jel ushyryp alyp kete jazdaǵan edi.
Sonymen qatar, qala turǵyndaryna úlken metall slaıd jáne kem degende 12 muz kompozıtsııasy ýáde etilgen, al alańda orta jáne eki shaǵyn muz slaıdtary ornalasady.
Bıyl Qyzylorda qalasynda Jańa jyl shyrshasyn ornatýǵa eshqandaı qarjy bólingen joq. Oǵan ótken jyly paıdalanylǵan jasandy shyrsha qoıylady.