Qazaqstan qalalarynda jańajyldyq keshterdiń baǵasy qansha

<p>ASTANA. KAZINFORM &ndash; Jańa jylǵa sanaýly kúnder ǵana qaldy. Dástúr boıynsha kóptegen ujymdar jańajyldyq korporatıv ótkizý úshin túrli nusqalardy qarastyryp jatyr. Kazinform tilshisi eldiń qaı aımaqtarynda bul sharany bıýdjettik turǵyda tıimdi ótkizýge bolatynyn anyqtap kórdi.</p>

Kókshetaý meıramhanalary jańa jyldy eń qoljetimdi baǵada – adam basyna 10 myń teńgege qarsy alýdy usynady. Bul somaǵa eki ystyq taǵam, bes salat, eki túrli shaı kiredi. Alkogoldi ishimdikter men shaıǵa táttilerdi syrttan alyp kelýge ruqsat beriledi. Sondaı-aq kontserttik baǵdarlama, júrgizýshi, shoý-balet qoıylymy, Aıaz Ata men Aqshaqardyń quttyqtaýy da qýanta túspek. Keıbir meıramhanalar jańa jyldyq brondaý úshin 20-25 myń teńge suraıdy. Sonymen qatar, keıbir meıramhana ıeleri bıyl korporatıvtik kesh ótkizýden múlde bas tartqan. Olar mundaı sharalar boıynsha iri bıznesten asyp túsý qıyn ekenin alǵa tartady.

Jańa jyldy tıimdi qarsy alýǵa bolatyn taǵy bir qalalar – Oral men Semeı. Mundaǵy baǵa adam basyna 10-15 myń teńgeden 25 myń teńgege deıin jetedi. Osyndaı shamadaǵy somany Taraz ben Óskemende de jumsaýǵa bolady. Alaıda, bul qalalarda alkogol men sýsyndar baǵaǵa kirmeıdi. Biraq baǵasy joǵaryraq iri mekemeler olardy ózińizben birge alyp kelýge ruqsat etedi.

Túrkistan turǵyndary úshin jańa jyldyq kesh sál qymbatqa — 15-ten 30 myń teńgege jetýi múmkin. Qyzylorda men Taldyqorǵanda baǵa 15-25 myń teńge aralyǵynda.

Aqtóbede jańajyldyq korporatıvter quny 15-30 myń teńgeden bastalady. Bul baǵaǵa alkogol kirmeıdi, biraq keshte qazaqstandyq estrada juldyzdary óner kórsetedi.

Qostanaıda jańajyldyq keshti 15-35 myń teńge aralyǵynda uıymdastyrýǵa bolady. Munda tanymal ártisterdiń qatysýymen all inclusive baǵdarlamalar da bar.

Petropavlda jańajyldyq kesh úshin ortasha baǵa –adam basyna 15 myń teńge. Bul somaǵa alkogol men shaı dastarhany kirmeıdi. Baǵa 25 myń teńgege deıin jetýi múmkin, biraq kóptegen mekemeler óz baǵdarlamalary men as mázirin 18-20 myń teńgege baǵalap otyr.

Jezqazǵanda bastapqy baǵalar sál joǵary – adam basyna 16-18 myń teńgeden bastalady.

Aqtaý men Atyraýda korporatıvtik kesh ótkizý quny adam basyna 20-35 myń teńgeden bastalady. Shymkentte jańa jyldyq keshtiń eń tómengi baǵasy – 20 myń teńge (ekonom-paket), biraq keıbir jerlerde baǵa 38 myń teńgege deıin kóteriledi.

Infografıka: Kazinform

Pavlodarda «korporatıvterdiń» ortasha baǵasy – 20-25 myń teńge, keıbir meıramhanalarda bul baǵa 30 myń teńgege deıin jetedi. Qala turǵyndary mundaı baǵalardy tym qymbat dep esepteıdi.

Qaraǵandyda korporatıvter qymbattyraq – 25-45 myń teńge aralyǵynda. Alkogol men shaı dastarhany dástúrli túrde bólek tólenedi.

Astanada korporatıvterdiń baǵasy 25 myń teńgeden bastalyp, orta eseppen 35 myń teńgege deıin jetedi. Biraq munda da erekshelikter bar. Keıbir meıramhanalar zaldardy tutastaı jalǵa beredi, ıaǵnı bul jerge kirý úshin keminde 50 oryn brondaý kerek. Jańajyldyq mázir 30-35 myń teńge shamasynda bolady, al aıyrmashylyq tek alkogoldi ónimderge baılanysty. Baǵaǵa as máziri, bar, merekelik baǵdarlama, sondaı-aq Aıaz ata men Aqshaqardyń quttyqtaýy kiredi.

Almatyda da korporatıv baǵalary shamamen osyndaı – 25-35 myń teńge aralyǵynda. Keıbir meıramhanalar arnaıy jańajyldyq paketter usynady. Mysaly, 25 myń teńge + 10% qyzmet kórsetý aqysy – nátıjesinde bir adamǵa 27 500 teńge shyǵady. Ekinshi paket – 29 myń teńge + 10% qyzmet kórsetý aqysy – barlyǵy 31 900 teńge. Bul baǵaǵa úsh túrli salat, sýyq taǵamdar, bir ystyq taǵam jáne bar qyzmeti kiredi. 29 myńdyq pakette qosymsha ekinshi ystyq taǵam men bes túrli taǵamdar usynylady.

Kóptegen mekemeler 15-20 jeltoqsan men 1 qańtar aralyǵynda jumys isteıdi, biraq 31 jeltoqsanda baǵa adam basyna 30-35 myń teńgege deıin kóteriledi, oǵan 10% qyzmet kórsetý aqysy qosylady.