Qazaqstan Izraılmen ekonomıkanyń mańyzdy salalaryndaǵy yntymaqtastyǵyn nyǵaıtýda

ASTANA. QazAqparat - 8-10 naýryzda qazaqstandyq delegatsııa jumys saparymen Izraıl memleketinde boldy. Delegatsııany Qazaqstan-Izraıl saýda-ekonomıkalyq yntymaqtastyq jónindegi birlesken komıssııanyń qazaqstandyq bóliginiń teńtóraǵasy, QR qarjy mınıstri B. Sultanov basqardy, dep habarlaıdy QR Úkimetiniń saıty .

Delegatsııa quramyna mınıstr B. Atamqulov basqarǵan Qorǵanys jáne aeroǵarysh ónerkásibi jáne Qorǵanys mınıstrlikteriniń jáne t.b. uıymdardyń ókilderinen turatyn úlken top kirdi. Bul top Izraıldiń ónerkásiptik nysandaryn aralap, birqatar kezdesýler ótkizdi.

Jumys saparynyń mindeti - Izraıl memleketiniń Premer-Mınıstri B. Netanıahýdyń 2016 jylǵy jeltoqsandaǵy Qazaqstanǵa resmı saparynyń qorytyndylary boıynsha qol jetkizgen ýaǵdalastyqtardy iske asyrýǵa negizdelgen.

Ónerkásip, aqparattyq-kommýnıkatsııa tehnologııalaryn damytý, qarjy, aýyl sharýashylyǵy salalarynda Izraıldiń memlekettik jáne bıznes-qurylymdarymen kelissózder ótti.

Sapar barysynda B. Sultanov Izraıldiń qarjy mınıstri Moshe Kahlonmen, Izraıldiń Syrtqy ister mınıstrliginiń basshylyǵymen kezdesti.

Qazaqstan-Izraıl úkimetaralyq komıssııasy Qazaqstanǵa ınvestıtsııalardy tartý jáne eki elde bıznesti júrgizý jaǵdaıyn jasaýǵa yqpal etetin quraldardyń biri bolyp tabylady. Osyǵan baılanysty, qarjy mınıstri B. Sultanov úkimetaralyq komıssııanyń teńtóraǵasy retinde bıznes qoǵamdastyqtyń ókilderimen kezdesti.

Sonymen qatar Qazaqstannyń Qarjy mınıstrliginiń ókilderimen Izraıl Úkimetinde Merkava jobasyn iske asyrý mysalynda jalpy servıstiń memlekettik ortalyǵyn qurý, bıýdjettik josparlaý úderisterin, memlekettik aktıvterdi, memlekettik satyp alýdy basqarýdy avtomattandyrý tájirıbesi qarastyryldy.

Budan ózge, aqparattyq-kommýnıkatsııalyq salada sarapshylar deńgeıinde «Tsıfrlyq Qazaqstan» jáne «Tsıfrlyq Izraıl» memlekettik baǵdarlamalary aıasynda yntymaqtastyqta túsinýshilikke qol jetkizildi. Agrotehnologııalar salasynda Aýyl sharýashylyǵy mınıstrliginiń sarapshylary transfert tehnologııasy aıasynda jáne birikken kásiporyndardy qurý boıynsha qazaqstandyq jáne ızraıldik sharýalardyń ortaq yntymaqtastyǵy úshin múmkindikter qarastyryldy. Densaýlyq saqtaý salasynda Qazaqstannyń Densaýlyq saqtaý mınıstrliginiń sarapshylary biliktilikti arttyrý, Qazaqstanda ızraıldik sarapshylardyń sheberlik-synyptaryn ótkizý, qazaqstandyq ýnıversıtettik klınıkalardy ızraıldik kompanııalardyń basqarýyna berý suraqtary talqylandy.

Úkimetaralyq komıssııanyń kezekti otyrysy bıylǵy mamyr aıyna josparlanǵan.

Aıta keterligi, Qazaqstannyń Izraılmen ózara taýar aınalymy (QR UEM Statıstıka komıtetiniń aqparaty boıynsha) 2016 jyldyń qańtar-jeltoqsan aılary boıynsha 301,9 mln dollardy qurady. Onyń ishinde eksport 235,5  mln dollar, ımport 66,3 mln dollar. 2015 jyldyń 12 aıy ishinde eksport - 219,073 mln dollardy, ımport - 92,034 mln dollardy quraǵan.

2005 jyl men 2016 jyldyń birinshi jartyjyldyǵy aralyǵynda Qazaqstanǵa Izraıldan tikeleı ınvestıtsııalardyń jalpy aǵym kólemi 213,3 mln AQSh dollaryn qurady. Investıtsııalardyń negizgi salasy - agroónerkásip kesheni, munaıgaz sektory. 2005 jyl men 2016 jyldyń birinshi jartyjyldyǵy aralyǵynda Qazaqstannan Izraılge tikeleı ınvestıtsııalardyń jalpy shyǵys kólemi 13,5 mln AQSh dollaryn quraǵan.