Qazaqstan izdeý salǵan 50 adam shet elderden ekstradıtsııalandy

ASTANA. QazAqparat – 2022 jyly izdeýde júrgen adamdardy ustap berý týraly 50 suraý salý shet memleketter tarapynan qanaǵattandyryldy. Bul týraly QR Bas prokýratýrasynan málim etti, dep habarlaıdy QazAqparat tilshisi.

Mysaly, ótken jyly Bahreın Koroldiginen kámeletke tolmaǵandar saýdasyna, atap aıtqanda, qyzdardy Qazaqstannan Bahreınge jynystyq paıdalanýǵa jibergeni úshin kúdikti A.Pıchýgına ustalyp, elimizge berildi.

Sol sııaqty «RBK banki» AQ-nyń 15 mln AQSh dollarynan astam qaajatyn urlady degen kúdikti V.Vlasov, qarjy pıramıdasyn («Qi TRADE Kazakhstan», «Vygodnye zaımy») qurǵany jáne basshylyq etkeni úshin izdeýde júrgen S.Absametova, B.Tomın jáne E.Sharıfýllın, quramynda 1 mlrd teńgeden astam somaǵa baǵalanǵan altyny bar materıaldy qylmystyq toptyń quramynda urlaǵany úshin A.Tımakov Reseı tarapynan ustap berilgen.

«Transulttyq uıymdasqan toptyń quramynda asa iri mólsherde altyn men zergerlik buıymdardyń ekonomıkalyq kontrabandasy úshin izdeýde júrgen Tastan Ebýbekırdi ustap berý týraly suranys Qyrǵyzstanmen qanaǵattandyryldy. Atys qarýyn qoldaný arqyly aýyrlatatyn mán-jaıda kisi óltirgeni úshin izdeýde júrgen O.Issaly men B.Isabekov Tájikstannan ekstradıtsııalandy. Alaıaqtyq jolymen 288 mln teńgeni urlaǵany úshin Qazaqstannyń quqyq qorǵaý organdary izdep júrgen A.Smalbaevany Ózbekstan tarapy ustap ber», - dep atap ótedi Bas prokýratýradan.

Aıta ketsek Memleket basshysynyń tapsyrmasy negizinde shetelden zańsyz shyǵarylǵan aktıvterdi qaıtarý boıynsha keshendi jumys júrgizilip jatyr. Úkimet jáne basqa da múddeli memlekettik organdarmen birlesip, zańsyz shyǵarylǵan aktıvterdi qaıtarý jónindegi qosymsha is-sharalar keshenin qamtıtyn zań jobasy ázirlenýde.