Qazaqstan-Italııa ónerkásiptik jobalar pýly qurylady

ASTANA. QazAqparat - QR Indýstrııa jáne ınfraqurylymdyq damý vıtse-mınıstri Marat Qarabaev Qazaqstannyń Italııadaǵy Elshisi Erbolat Sembaev bastaǵan Italııadan kelgen delegatsııamen kezdesti, dep habarlaıdy QazAqparat.

Ekijaqty kezdesý tek mashına jasaý salasynda ǵana emes, metallýrgııa, hımııa, jeńil ónerkásip jáne qurylys ındýstrııasy salalarynda da yntymaqtastyqty belsendi túrde arttyrýǵa jáne eki el arasynda seriktestikti qalyptastyrýǵa baǵyttalǵan.

Qazirgi kezde Qazaqstan Italııadan krandar, klapandar, sorǵylar, jeldetkishter men túrli jabdyqtardy ımporttaıdy. Osyǵan baılanysty eki tarap joǵaryda atalǵan salalarda yntymaqtastyq ornatýǵa múddeli. Óz kezeginde Italııaǵa elimizden ferroqorytpalar, óńdelmegen alıýmınıı, baǵaly materıaldardyń synyqtary, bolat ónimderi jáne qorǵasyn eksporttalady.

«Búgingi tańda eldi ındýstrııalandyrý quraldarynyń biri retinde ónerkásip salalarynda ınvestıtsııalyq jobalardy iske asyrýǵa erekshe kóńil bólinedi. Jaqyn arada qazaqstandyq-ıtalııalyq ónerkásiptik jobalar pýly qurylady dep kútilýde», – dep atap ótti Marat Qarabaev.

Investorlar úshin barynsha tartymdylyqty qalyptastyrý maqsatynda erekshe jaǵdaılar jasalǵan. Qazaqstan men Italııa arasyndaǵy taýar aınalymy 2022 jyldyń 7 aıynda 9,2 mlrd AQSh dollaryn qurady. Qazaqstannan Italııaǵa eksport kólemi bıyl 7 aıda ótken jyldyń sáıkes kezeńimen salystyrǵanda 2 esege artyp, 8,7 mlrd AQSh dollarǵa jetti.

Import máselesine keletin bolsaq, 2022 jyldyń 7 aıynda ımport kólemi 9,7 paıyzǵa artqan. Aıta keterligi, Italııa mashına jasaý, metallýrgııa, munaı hımııasy jáne jeńil ónerkásip salalary boıynsha úshinshi orynda, aıaq kıim óndirisi boıynsha ekinshi orynda tur.

Foto : gov.kz