Qazaqstan ISO halyqaralyq standarttaý uıymyndaǵy belsendiligin arttyrdy

ASTANA. QazAqparat – Qazaqstan ISO Halyqaralyq standarttaý uıymyndaǵy belsendiligin arttyrdy. Qazirgi ýaqytta ISO keńesine jáne onyń tehnıkalyq basqarý bıýrosyna qosylý boıynsha jumystar júrip jatyr. Bul týraly Saýda jáne ıntegratsııa mınıstrligi Tehnıkalyq retteý jáne metrologııa komıtetiniń baspasóz qyzmetinen málimdedi, dep habarlaıdy QazAqparat tilshisi.

Komıtet málimetinshe, bul qadam osy uıymnyń saıasatyn qalyptastyrý jáne ózekti máselelerine aralasýǵa, elimizdiń ulttyq múddesin ilgeriletýge múmkindik beredi.

«Álemdik tájirıbede ulttyq kásiporyndar standarttardy ázirleý jumystaryna belsendi qatysady, olardy ázirleýge qarajat salady. Sol arqyly ónerkásiptiń múddesin ulttyq naryqta da, álemdik naryqta da ilgeriletýdi qamtamasyz etedi. Bul eldiń jalpy ekonomıkasyna jáne jekelegen kásiporyndarǵa tikeleı áser etedi», - dedi Tehnıkalyq retteý jáne metrologııa komıteti tóraǵasynyń orynbasary Janna Esenbekova.

Sonymen qatar, Qazaqstan 3 jańa halyqaralyq standarttaý jobasyn ázirleý jóninde usynystar engizgen. Quzyrly organnyń dereginshe, elektrotehnıkalyq ónimderdi synaý nátıjelerin rastaýdyń jahandyq júıesine qosylý jumystary qolǵa alynǵan.