Qazaqstan ishki naryqtyń tek 8 paıyzyn ǵana qantpen qamtyp otyr - Atameken UKP
«Qazirgi ýaqytta elimiz 12,3 gektar aýmaqqa qant qyzylshasyn egedi. Ol eldiń tek 8 paıyzyn ǵana qantpen qamtýǵa jetedi. Búginde ár gektardan 40 myń tonna qant alyp otyrymyz. Eger sýarmaly qant qyzylshasy alqabyn 104 myń gektarǵa ulǵaıtsa, onda ishki naryqtyń 80 paıyzyn tolyq qantpen qamtý múmkindigi bar», - dep atap ótti Erbol Eseneev.
Al, «Atameken» UKP Agroónerkásip kesheni komıtetiniń tóraǵasy Jıgýlı Daırabaev bolsa, Almaty men Jambyldaǵy qant zaýyttary tolyq qýatynda jumys istep turmaǵanyn aıtty.
«Bizde respýblıka boıynsha qant óndiretin Almaty men Jambyldaǵy zaýyttar. Olardyń ózderi tolyq qýattylyqpen jumys istep turǵan joq. 12 aıdyń ishinde 2-3 aı jumys isteıdi de, turady. Ol jerde qanshama jumys kúshi bar. Olardyń januıalary bar. Eger dúken sórelerindegi qanttyń baǵasy arzan bolsyn desek, biz oǵan durys kóńil bólýimiz kerek. Bizde óndiretin ónim jetpeıdi. Qant qyzylshasynyń egis alqabyn kóbeıtý qajet. Osyǵan baılanysty azamattar da jumyspen qamtylady. Ózimizdiń otandyq tuqymdardy egý qajet. Biz shetelden tuqym alamyz, jeńil-jelpi dúnıe jasaımyz degen – bos sóz», - dedi Jıgýlı Daırabaev.
Budan bólek, keshegi Úkimettiń keńeıtilgen otyrysynda Prezıdent júktegen tapsyrmalardy talqylaý barysynda «Atameken» UKP sarapshylary fermerlerge jeńildikpen nesıe berý máselesin kóterdi. Elimizde 300 myńnan astam fermer bar. Sarapshylardyń aıtýynsha, olarǵa qajetti jaǵdaı jasalyp jatqan joq. Sondyqtan, «Atameken» UKP ókilderi sharýashylyqtarǵa kásibiniń kólemine baılanysty nesıe berý qajet ekenin atap ótti.
Eske salsaq, Úkimettiń keńeıtilgen otyrysynda Memleket basshysy Qasym-Jomart Toqaev qant tapshylyǵyn retteı almaǵan Saýda jáne ıntegratsııa mınıstri Baqyt Sultanov pen Aýyl sharýashylyǵy mınıstri Erbol Qarashókeevke sógis jarııalady.