Qazaqstan Iranmen kólik-logıstıkany damytýda kelissóz júrgizip jatyr

TEGERAN. QazAqparat – Iran men Qazaqstan kólik-logıstıka salasynda mańyzdy óńirlik habqa aınala alady. Bul týraly QR Premer-Mınıstriniń orynbasary – saýda jáne ıntegratsııa mınıstri Baqyt Sultanovtyń Iran Islam Respýblıkasynyń birinshi Vıtse-prezıdenti Mohammad Mohbermen kezdesýinde aıtyldy, dep habarlaıdy QazAqparat.

QR Úkimeti basshysynyń baspasóz qyzmetinen málim etkendeı, qazaqstandyq delegatsııa Tegeranda Iran Islam Respýblıkasynyń (IIR) basshylyǵymen saýda-ekonomıkalyq yntymaqtastyqty keńeıtý jáne eki el arasyndaǵy tranzıttik áleýetti jandandyrý máseleleri boıynsha kelissóz júrgizdi.

IIR-diń birinshi Vıtse-prezıdenti Mohammad Mohbermen kelissóz barysynda qazaqstandyq tarap Iran aýmaǵy arqyly «Soltústik-Ońtústik» baǵyty boıynsha, keıinnen Parsy shyǵanaǵy, Afrıka, Ońtústik Azııa elderine jáne basqa da óńirlerge, onyń ishinde mýltımodaldyq júk tasymaldaryn paıdalana otyryp, júkterdi tasymaldaýdy ulǵaıtýǵa múddeliligin rastady. Qazaqstan-Iran kólik yntymaqtastyǵyn keńeıtýdiń mańyzdylyǵy týraly aıta kele, Iran tarapy kólik-logıstıkalyq yntymaqtastyqty damytý jónindegi kelissózderdiń jemisti sıpatyn atap ótti. IIR birinshi Vıtse-prezıdenti M. Mohber osy maqsattarǵa qol jetkizý Iran men Qazaqstandy mańyzdy óńirlik habqa aınaldyra alatynyn atap ótti.

Eki tarap ta sońǵy jyldary taýar aınalymy ósiminiń jaqsy serpini baıqalyp otyrǵanyn atap ótti. Sonymen qatar Iranmen saýdadaǵy qazirgi halyqaralyq shekteýler kezinde de áleýet eleýli bolyp qalýda. Mysaly, tamaq ónerkásibinde Qazaqstan astyq, kondıterlik jáne un ónimderiniń, et jáne et ónimderiniń, sondaı-aq janýarlardan alynatyn basqa da ónimderdiń eksportyn ulǵaıtýǵa daıyn. Bul rette, Qazaqstanda Iran jemis-kókónis ónimine suranys bar.

Kelissózder barysynda taraptar ónerkásiptik kooperatsııa salasyndaǵy yntymaqtastyqty arttyrý máselelerin de talqylady. Aýyl sharýashylyǵy ónimderin qaıta óńdeý salasyndaǵy birlesken jobalardy, mysaly, aýyl sharýashylyǵy shıkizatyn qaıta óńdeý jónindegi jobalardy iske asyrý úshin úlken múmkindikter bar ekeni atap ótildi.

Budan bólek, saýda, aýyl sharýashylyǵy, densaýlyq saqtaý, munaı, kólik jáne qalalyq damý mınıstrlikterinde, sondaı-aq temirjol ákimshiliginiń, Ulttyq banktiń, ulttyq munaı kompanııasynyń basshylyǵymen, Saýda-ónerkásip palatasynyń jáne eldiń keıbir provıntsııalarynyń ókilderimen kezdesýler ótti.

Aıta keteıik, Irandyq ınvestorlardyń qatysýymen Qazaqstan aýmaǵynda et kombınatyn salý, maıly daqyldardy qaıta óńdeý, astyq jınaý kombaındaryn qurastyrý jáne ózge de jobalar tabysty iske asyryldy.

Iran tarapy saýda mıssııalarymen, ónim kórmelerimen jáne jetistiktermen almasý eki eldiń jeke sektory men kásipkerleri arasyndaǵy yntymaqtastyqty keńeıtýge yqpal etetinin atap ótti.