Qazaqstan Iranǵa qandaı taýarlardy jeńildikpen kirgize alady

NUR-SULTAN. QazAqparat - Parlament Senatynyń jalpy otyrysynda «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Iran Islam Respýblıkasy arasyndaǵy erkin saýda aımaǵyn qurýǵa alyp keletin ýaqytsha kelisimdi ratıfıkatsııalaý týraly» Zańdy qabyldady, dep habarlaıdy QazAqparat tilshisi.

Bul kelisimge 2018 jylǵy mamyrda Qazaqstan elordasynda qol qoıyldy. Osy oraıda Iranmen erkin saýda aımaǵyn qurý bastamasyn Memleket basshysy 2014 jyly Kaspıı mańy memleketteri basshylarynyń sammıtinde usyndy.

«Bul kelisimdi iske asyrý otandyq taýarlardy 80 mıllıonnan astam halqy bar Irannyń perspektıvti naryǵyna shyǵarý arqyly olardyń eksportyn ulǵaıtýǵa múmkindik beredi. Jalpy alǵanda, osyndaı kelisim eksportty álemdik naryqqa shyǵarý tetikteriniń biri bolyp otyr», - dedi Ulttyq ekonomıka mınıstri Rýslan Dálenov.

Belgili bolǵandaı, Iranmen ózara saýda kólemi 2018 jyly 516 mln AQSh dollaryna jetti, onyń ishinde 82,6 paıyzy Iranǵa baǵyttalǵan eksportqa tıesili. Eksportqa shyǵarylǵan negizgi taýarlar arasynda arpa, bolat, raps tuqymy, qoı eti bar.

Kelisimge sáıkes, Iran tarapy 864 taýarǵa qatysty ımporttyq baj stavkalaryn tómendetedi. Iran naryǵyna iri qara mal jáne qoı eti, burshaq daqyldary, ósimdik maıy, kondıterlik ónimder, relster, akkýmýlıatorlar, armatýra men qubyrlar jáne basqa da taýarlardy jeńildetilgen tarıf boıynsha ákelý múmkin bolady.

«Bul taýarlar búginde Qazaqstannyń Iranǵa eksportynyń jartysynan astamyn alyp otyr. Óz kezeginde Eýrazııalyq ekonomıkalyq odaq elderi 502 taýar boıynsha ımporttyq baj stavkalaryn tómendetedi. Olardyń ishinde qurma, júzim, kondıterlik ónimder, ydys, kilemder jáne ózge taýarlar qamtylǵan», - dedi mınıstr.

Kelisim ratıfıkatsııalaý rásimderin taraptar aıaqtaǵannan bastap 60 kúnnen keıin kúshine enedi. Onyń qoldanylý merzimi úsh jyl.

«Ratıfıkatsııalaýdan keıin 1 jyl ishinde taraptar erkin saýda aımaǵy týraly turaqty kelisim boıynsha kelissózderdi bastaıdy. Ýaqytsha kelisim erejeleri Dúnıejúzilik saýda uıymy normalaryna tolyq sáıkes keledi», - dedi Rýslan Dálenov.