Qazaqstan Iran men Ortalyq Azııa arasyndaǵy dostyqqa dáneker bolyp otyr — Muhammed Mohber

<p>ASTANA. KAZINFORM — Iran Prezıdentiniń mindetin atqarýshy Muhammed Mohber Ortalyq Azııa men Tehran arasyndaǵy qarym-qatynastyń damýynda Qazaqstannyń sheshýi ról oınap otyrǵanyn aıtty.</p>

«Biz Qazaqstan sııaqty dos peıildi eldermen ózara qarym-qatynasymyzdy joǵary baǵalaımyz jáne qonaqjaılyǵyńyz úshin alǵys aıtamyz. Sizder árdaıym Iran men Ortalyq Azııa aımaǵynyń arasyndaǵy ózara dostyqty ilgeriletýshi el bolyp kele jatyrsyzdar. Sizdermen aramyzda órkenıettik tarıhı baılanys bar. Ortalyq Azııa elderi men Iran arasyndaǵy ózara qarym-qatynas keńeıe túsedi dep úmittenemiz», — dedi ol «ShYU+» kezdesýinde. 

Sondaı-aq, Iran basshysy ShYU elderin saýda-sattyqta ulttyq valıýtany kóbirek paıdalanýǵa shaqyrdy.

«ShYU-nyń halyqaralyq jáne aımaqtyq rólin arttyrýdyń mańyzdy bir joly — ekonomıkalyq qarym-qatynastyń qaýipsizdigin qamtamasyz etý. Bul turǵyda saýda-sattyqtaǵy ulttyq valıýta úlesin qoldap, keńeıtý ózekti. Ol úshin zamanaýı tehnologııalardy belsendi paıdalanyp, birlesip jumys isteýimiz kerek», — dedi Muhammed Mohber.