Qazaqstan Iran arqyly Parsy shyǵanaǵyna shyǵa alady – Kólik komıteti

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide QR Kólik komıteti tóraǵasynyń mindetin atqarýshysy Qasym Tilepov júk tasymalyndaǵy Iran baǵytynyń áleýetine toqtaldy, dep habarlaıdy QazAqparat tilshisi.

«Iran baǵytynyń áleýetin qazir 19 paıyz kóleminde ǵana paıdalanyp otyrmyz. Sondyqtan bul marshrýtty qoldanýda úlken áleýet bar. Bul bizdiń Parsy shyǵanaǵyna shyǵýymyzǵa múmkindik beredi. Parsy shyǵanaǵy arqyly Úndistanǵa, odan ári ashyq teńiz joldarymen Eýropa naryǵyna ótýge bolady. Onyń ústine ótken aıda ǵana Memleket basshysy Iranda boldy. Sol kezde konteıner tasıtyn poıyz demonstratsııalyq sapar jasady. Qazaqstan. Túrikmenstan, Iran aýmaqtaryn basyp ótken bul poıyz Túrkııaǵa tikeleı shyqty. Bul da áleýeti jaqsy mashrýttardyń biri», - dedi vedomstvo basshysy.

Sondaı-aq, ol Qazaqstannyń Ortalyq Azııadaǵy eń negizgi kólik-logıstıkalyq habqa aınalatyn múmkindigi bar ekenin eske saldy.

«Bulardyń bárindegi negizgi josparymyz – Qazaqstandy Ortalyq Azııanyń basty kólik-logıstıkalyq habyna aınaldyrý. Ol úshin búkil alǵysharttar bar. Kólik ınfraqurylymynyń qańqasy qurylǵan. Qazir sol áleýetti kúsheıtilgen rejımde keńeıtý kerek», - dedi Qasym Tilepov.

Eske salsaq, QR Prezıdenti Qasym-Jomart Toqaev munaı tasymaldaýda Transkaspıı baǵdaryn damytýdy tapsyrǵan edi.

Foto: atameken.kz