Qazaqstan Irakqa sıyr men qoı etin eksporttamaq

<p>ASTANA. KAZINFORM &ndash; Búgin Aýyl sharýashylyǵy vıtse-mınıstri Ermek Kenjehanuly Irak Respýblıkasynyń Qazaqstan Respýblıkasyndaǵy ýaqytsha senimdi ókili Djaber Najma Adbýllah Ál-Temımımen kezdesti. Bul týraly QR AShM baspasóz qyzmeti málim etti.&nbsp;</p>

Vıtse-mınıstrdiń málimetinshe,  2023 jyly QR men Irak arasyndaǵy AÓK ónimderiniń taýar aınalymy 1 mln dollardy, 2024 jylǵy qańtar-shildede 672 myń dollardy quraǵan. Al, QR-dan Irakqa eksport 2024 jylǵy qańtar-shildede 640 myń dollardan asqan. Negizinen Irakqa pııaz, kúrish, un, iri qara jáne usaq mal maıy eksporttalady.

 

«Aýyl sharýashylyǵy salasyndaǵy yntymaqtastyqtyń áleýeti zor. Biz ekijaqty baılanystardy nyǵaıtýǵa, saýdany damytýǵa, astyq, kúrish, un, sondaı-aq mal sharýashylyǵy ónimderin jetkizýdi jandandyrýǵa daıynbyz. Eksporttalatyn pozıtsııalardyń tizimi keńeıtilip, jetkizilim kólemi ulǵaıtylýy múmkin», - dep atap ótti vıtse-mınıstr.

Óz kezeginde Djaber Najma Adbýlla Ál-Temımı birqatar baǵyttar boıynsha qarym-qatynasty damytýdy usyndy.

«Biz melıoratsııa, agrotehnıka, mal sharýashylyǵy salasynda oń tájirıbesi bar Qazaqstanmen yntymaqtastyqqa múddelimiz», - dedi ol.

Osyǵan baılanysty Ermek Kenjehanuly AShM-niń iri jáne usaq mal eksportyn keńeıtý, jańa naryqtar ashý boıynsha qabyldap jatqan sharalary týraly aıtyp berdi.

Atap aıtqanda, jergilikti aýyl sharýashylyǵy taýaryn óndirýshiler Irakqa 30 myń tonnaǵa deıin qazaqstandyq sıyr men qoı etin jetkizýge, sondaı-aq ІQM-niń asyl tuqymdy jáne ónimdi sapasyn jaqsartý úshin asyl tuqymdy materıal berýge daıyn.

Kezdesý sońynda taraptar aýyl sharýashylyǵy salasyndaǵy ózara tıimdi yntymaqtastyqty odan ári nyǵaıtý týraly kelisti.