«Qazaqstan ıpotekalyq kompanııasy» jalǵa beriletin turǵyn úılerdi salý úshin 2 enshiles kompanııa qurady

ASTANA. 7 tamyz. QazAqparat  «Qazaqstan ıpotekalyq kompanııasy» «Qoljetimdi baspana-2020» baǵdarlamasynyń aıasynda jalǵa beriletin túrǵyn úılerdiń qurylysy boıynsha jumysty bastady, dep habarlady kompanııanyń baspasóz qyzmeti pm.kz saıtyna.

«Qazaqstan ıpotekalyq kompanııasy» «Qoljetimdi baspana-2020» baǵdarlamasynyń aıasyndaǵy «Satyp alý quqyǵymen jalǵa beriletin baspana» baǵytynyń operatory bolyp tabylady. Qazirgi tańda kompanııa óńir ákimdikterimen jáne Qurylys jáne TKSh isteri jónindegi agenttikpen birlesip, jalǵa beriletin úıler salynatyn jer telimderin anyqtaý jáne enshiles kompanııalar qurý jónindegi jumystar júrgizýde», - delingen habarlamada.

Kompanııa «Qazaqstannyń túrǵyn úı-qurylys kompanııasy» AQ jáne «Biryńǵaı tólem júıesi» JShS sııaqty enshiles uıymdar qurýdy josparlap otyr.

Aqparatqa súıensek, ákimdikter jalǵa beriletin turǵyn úıler salynatyn jer telimderi men áleýetti arendatorlardyń tizimderin «Qazaqstan ıpotekalyq kompanııasyna» beredi.

Al kompanııa óz kezeginde, turǵyn úıdiń qurylysyn qamtamasyz etedi, páter jaldaýshylardyń tólem qabiletterin baǵalaıdy jáne arendatorlardyń naqty pýlyn jasaqtaıdy. Odan keıin «Qazaqstannyń túrǵyn úı-qurylys kompanııasy» jobalaý-smetalyq qujattardy jasaý, qujattardy memlekettik saraptaýdan ótkizý jáne áleýetti qurylys júrgizýshilerdi anyqtaý jumystaryn júrgizedi, qurylys jumystarynyń barlyq kezeńin baqylaıdy,  jalǵa beriletin turǵyn úılerdi paıdalanýǵa qabyldap alýdy jáne iske qosýdy qamtamasyz etedi.

Qurylysy aıaqtalǵan baspana Biryńǵaı tólem júıesiniń aıasynda bólinedi jáne osy júıeniń aıasynda jalǵa berý kelisimsharttary jasalady.

«Sońǵy jyldary elimizdiń ıpotekalyq naryǵy oń dınamıka kórsetip otyr. Jaqyn arada ıpotekalyq nesıelendirýdiń sharttary qazirgiden de jumsaratyn bolady deýge bolady, sebebi naryqty damytýda memlekettik turǵyn úı baǵdarlamalary úlken rol atqarady», - delingen «Qazaqstan ıpotekalyq kompanııasy» AQ-gyń habarlamasynda.

«Qoljetimdi baspana-2020» baǵdarlamasyn iske asyrýdyń barysynda elimizdiń barlyq óńirinde shamamen 3 mln. sharshy metr jalǵa beriletin baspana salý josparlanýda, onyń ishinde 2014-2015 jyldary -250 myń sharshy metrge deıin, al 2016 jyldan bastap jyl saıyn  500 myń sharshy metrge deıin jalǵa beriletin baspana turǵyzylmaq.