Qazaqstan ıpotekalyq kompanııasy muǵalim men dárigerge arnalǵan jeke joba ázirledi
Joba týraly «Qazaqstan ıpotekalyq kompanııasy» IU»AQ klıentterge qyzmet kórsetý bóliminiń basshysy Ásel Káketaeva Nur-Sultan qalasy ákimdiginiń onlaın baspasóz máslıhatynda aıtyp berdi.
Jańa joba boıynsha muǵalimder jáne dárigerlerge turǵyn úı berý berý baǵdarlamasynyń jańa tártibi men úıdiń quny anyqtalǵan.
«Qazaqstan ıpotekalyq kompanııasy 2015 jyldan bastap 4 jyl shamasynda 18 500-den astam jalǵa alýshy arasynda 1 mln sharshy metrden astam úı jalǵa berdi. Osy áleýmettik baǵdarlamany tabysty júzege asyrý arqasynda kompanııa muǵalimder men dárigerlerdiń turǵyn úı máselesin sheshý úshin baǵdarlamanyń jeke jobasyn ázirlep, usyndy», - deıdi Ásel Káketaeva.
Onyń aıtýynsha, osy jobany iske asyrý barysynda atalǵan kompanııa birneshe mınıstrlikpen kelisip, jańa jobaǵa qol qoıylǵan.
«Onyń ishinde QR Bilim jáne ǵylym mınıstrligi men QR Densaýlyq saqtaý mınıstrligimen birigip jańa joba bastadyq. Jańa joba boıynsha muǵalimder jáne dárigerlerge turǵyn úı berý berý baǵdarlamasynyń jańa tártibi men úıdiń quny anyqtaldy. Taǵy bir aıtyp ótetin jaǵdaı, 2019 jyly Nur-Sultan qalasy ákimdigi muǵalimder men dárigerlerge 244 páter berýge sheshim qabyldanǵan. Bizdiń baǵdarlamaǵa qatysý úshin úmitkerler jumys ornyna qajetti qujatyn tapsyrady. Qatysýshylardyń tizimi ákimdik pen mınıstrlikte qaralady. Negizgi tizimder, tólem qabilettiligi «Qazaqstan ıpotekalyq kompanııasynda» qaralady», - deıdi ol.
Sondaı-aq, ol baǵdarlamanyń negizgi talaptaryn atap ótti.
«Satyp alý quqyǵymen jalǵa alý merzimi 20 jylǵa deıin. Bastapqy jarna talap etilmeıdi. Turǵyn úı jaldaý merzimi aıaqtalǵannan keıin úı jalǵa alýshynyń menshigine ótedi. Kez kelgen jalǵa beriletin turǵyn úıdi merziminen buryn satyp alý usynylady. Elordada 1 sharshy metr úıdiń jaldaý quny - 1 455 teńge.Tólem qabileti rastalǵan jaǵdaıda kompanııanyń saıtyna kirip, jalǵa alǵyńyz keletin páterdi tańdaýǵa bolady», - deıdi Ásel Káketaeva.