«Qazaqstan ıpotekalyq kompanııasy» el aýmaǵynda 285 myń sharshy metr baspana salmaq
Bul týraly búgin «Qoljetimdi baspana-2020» baǵdarlamasynyń júzege asyrylý barysy keńinen talqylanǵan Úkimet otyrysynda Qazaqstan ıpotekalyq kompanııasynyń basshysy Saǵyndyq Qusaıynov málim etti.
«Oblys basshylarymen júrgizilgen jumystardyń nátıjesinde 2014 jyldyń 1 qańtardaǵy jaǵdaı boıynsha barlyq óńirlerde turǵyn úı salý úshin 132 gektar jer telimi bólindi. Almaty, Astana, Petropavl, Taldyqorǵan, Qostanaı, Aqtóbe qalalarynda qurylysqa bólingen jer ýchaskeleriniń kólemi birshama artyq», - dedi ol.
Onyń atap ótýinshe, 2014 jyldyń 1 qańtaryndaǵy jaǵdaıǵa sáıkes korporatsııada memlekettik saraptamadan ótken ári qurylys jumystaryn júrgizýge daıyn jalpy quny 10,5 mlrd. teńgeni quraıtyn 100 myń sharshy metrlik turǵyn úı jobasy bar.
«2014 jyldyń 1 sáýirine deıin ol 11 mlrd. teńge somaǵa jalpy aýmaǵy 104 myń sharshy metrdi quraıtyn turǵyn úı jobasymen tolyǵatyn bolady. Korporatsııa qazirgi ýaqytta somasy 8 mlrd. teńgeni quraıtyn 82 myń sharshy metr turǵyn úıdi Almaty, Qaraǵandy jáne Shymkent qalalarynda salýda. Qoryta aıtqanda, korporatsııa qorjynynda jalpy somasy 29 mlrd. teńgeni quraıtyn 285 myń sharshy metrlik turǵyn úı jobasy bar», - dedi S.Qusaıynov.