Qazaqstan Iordanııany jaqyn ári baýyrlas el sanaıdy - Nursultan Nazarbaev

ASTANA. QazAqparat - Qazaqstan Iordanııany jaqyn ári baýyrlas el sanaıdy. Bul týraly búgin  Aqordada elimizge resmı saparmen kelgen Iordanııa Hashımıt Koroldiginiń Koroli Abdalla ІІ ben ál-Hýseınmen ótken kelissózderden keıingi birlesken baspasóz málimdemesi barysynda Elbasy Nursultan Nazarbaev aıtty, dep habarlaıdy QazAqparat.

«Eń aldymen Iordanııa Koroli Abdalla ІІ ben ál-Hýseınge meniń shaqyrýymdy qabyl alyp,  Qazaqstanǵa kezekti resmı saparymen  kelgeni úshin  shynaıy rızashylyǵymdy bildiremin. Biz Iordanııany Taıaý Shyǵystaǵy, jalpy Arab álemindegi mańyzdy rólge ıe bolyp otyrǵan halyqaralyq qaýymtastyqtyń beldi múshesi retinde qarastyramyz. Kelesi  jyldyń aqpan aıynda eki eldiń arasyndaǵy dıplomatııalyq qarym-qatynastyń ornaǵanyna 25 jyl tolady. Sonyń qarsańynda kezdesip otyrǵanymyzdyń máni óte úlken. Shırek ǵasyrda elderimiz túrli  saladaǵy baılanystaryn damytyp, dostyq jáne senim qarym-qatynasyn ornatty. Bul Korol Abdolla ekinshiniń Qazaqstanǵa degen ystyq yqylasynyń arqasynda júzege asqan úlken kelisimder dep atap ótkim keledi», - dedi Qazaqstan Prezıdenti.

Osy rette Memleket basshysy Abdalla ІІ ben ál-Hýseınniń parasatty jáne kóregen saıasatynyń nátıjesinde Iordanııa qarýly qaqtyǵystar shyqqan Taıaý Shyǵys óńirinde turaqtylyq pen qaýipsizdik oazısi mártebesin ıelenip otyrǵanyn basa aıtty.

«Al aldaǵy ýaqytta da memleketaralyq qatynastardyń barlyq baǵyttary boıynsha ózara tıimdi yntymaqtastyqty damytýǵa kelistik. Eń bastysy Qazaqstan Iordanııany jáne onyń halqyn jaqyn ári baýyrlas el dep sanaıdy. Kóptegen halyqaralyq, óńirlik máseleler boıynsha  bizdiń ustanymdarymyz  bir bolyp kele jatyr», - dedi Elbasy.