Qazaqstan ınnovatsııalyq damý boıynsha álemdik reıtıngide 79-orynda tur

NUR-SULTAN. QazAqparat – Qazaqstan ınnovatsııalyq damý kórsetkishteri boıynsha álemdik reıtıngide 132 eldiń arasynda 79-orynǵa turaqtady, dep habarlaıdy QazAqparat tilshisi Ranking.kz resýrsyna silteme jasap.

Ulttyq statıstıka bıýrosynyń zertteýlerine sáıkes, byltyr 28,2 myń kompanııanyń tek 3 myńy ǵana ınnovatsııalyq tehnoloııalardy qoldanatyny anyqtalǵan. Osylaısha, Qazaqstannyń ınnovatsııa salasyndaǵy belsendilik deńgeıi – 10,5 paıyzdy qurady.

Onyń ishinde el boıynsha joǵary kórsetkishter elordada baıqalǵan. Bas qalada ınnovatsııalyq belsendilik dárejesi 13,5 paıyz deńgeıinde. Odan keıin Qaraǵandy (13%) jáne Aqtóbe (12,5%) oblystary tur. Innovatsııalyq tehnologııalardy engizýdegi eń nashar kórsetkish – Pavlodar oblysynda. Onda kompanııalardyń bul saladaǵy belsendiligi 5,2 paıyz ǵana.

Al jalpy álemdik reıtıngide Shveıtsarııa, Shvetsııa jáne AQSh kósh bastap tur. TMD elderiniń arasyndaǵy kórsetkishter boıynsha, Qazaqstan Reseı, Ýkraına, Belarýs, Moldova jáne Armenııadan keıingi orynda. Reıteıngide bizdiń elden keıin Ázerbaıjan, Ózbekstan, Qyrǵyz Respýblıkasy men Tájikstan tur.