Qazaqstan HVQ-men strategııalyq seriktestikti joǵary baǵalaıdy - Álıhan Smaıylov

NUR-SULTAN. QazAqparat - QR Premer-Mınıstri Álıhan Smaıylov beınekonferentsııa baılanysy rejıminde Halyqaralyq Valıýta Qory mıssııasynyń ókilderimen kezdesý ótkizdi, dep habarlaıdy QazAqparat Úkimettiń resmı saıtyna silteme jasap.

Kezdesýge HVQ-nyń Qazaqstan boıynsha mıssııasynyń basshysy Nıkolıa Blanshe, onyń orynbasary Alehandro Haıdenberg, Eýropa departamentiniń aǵa ekonomısti Gregorıo Impavıdo, sondaı-aq Shveıtsarııa kishi tobynyń atqarýshy dırektory Petr Trabınskı jáne QR-nyń birqatar ortalyq memlekettik organdarynyń basshylary qatysty.

Kezdesý basynda Álıhan Smaıylov Qazaqstannyń HVQ-men strategııalyq seriktestikti joǵary baǵalaıtynyn atap ótti. Bıyl bizdiń elimiz ben Uıym arasyndaǵy yntymaqtastyqqa 30 jyl tolyp otyr.

Qazirgi ýaqytta QR Úkimeti Memleket basshysy Qasym-Jomart Toqaevtyń «Jańa Qazaqstan» tujyrymdamasynda belgilengen demokratııalyq jáne áleýmettik-ekonomıkalyq qaıta qurýdy iske asyrý boıynsha belsendi túrde jumys júrgizip jatyr.

Olar zań shyǵarýshy bılikti nyǵaıtýǵa, quqyq ústemdigine, ekonomıkany sapaly jańǵyrtýǵa, básekelestikti kúsheıtýge, jeke menshikti qorǵaýǵa, demonopolızatsııalaýǵa, memlekettiń ekonomıkaǵa shamadan tys qatysýyn azaıtýǵa baǵyttalǵan.

«HVQ Qazaqstan ekonomıkasy úshin múmkindikterdi keńeıtip otyr, jańa reformalardy iske asyrý aıasynda ol biz úshin asa mańyzdy», — dedi Álıhan Smaıylov.

Premer-Mınıstr Qazaqstannyń ekonomıkany dekarbonızatsııalaý, kómirtekti azaıtý jáne fıskaldyq saıasattyń tıimdi tetikterin engizý boıynsha ozyq halyqaralyq tájirıbege múddeli ekenin aıtty.

Óz kezeginde Nıkolıa Blanshe ótken kezeńde yntymaqtastyqtyń kóptegen baǵyttary boıynsha nátıjeli jumys júrgizilgenin atap ótti. HVQ Qazaqstanǵa ári qaraı da qoldaý kórsetýge daıyn.

Kezdesýge qatysýshylar HVQ mıssııasynyń qorytyndylaryn, makroekonomıkalyq saıasattyń basym baǵyttary men qurylymdyq reformalar boıynsha usynymdardy, QR Úkimetiniń kómirtek saldaryn azaıtý jónindegi josparlaryn, sondaı-aq Qazaqstan men HVQ-nyń ózara is-qımylynyń aldaǵy kezeńderin talqylady.

«Múmkindikti paıdalanyp, HVQ-ǵa bizdiń jumysymyzǵa únemi qoldaý kórsetetini úshin alǵys aıtqym keledi. Aradaǵy tıimdi yntymaqtastyq ári qaraı jalǵasady dep senemin», — dep túıindedi QR Premer-Mınıstri.