Qazaqstan hokkeıshileriniń Olımpıadaǵa irikteý satysyndaǵy qarsylastary kimder
Alǵashqy qarsylasymyz – Ýkraına da álemdik hokkeıde óz ornyn enshilegen. 1992 jyly 14 sáýirde ótken alǵashqy kezdesýinde Ýkraına Qazaqstannan 1:5 esebimen jeńilip qalǵan bolatyn. Atalmysh qurama Olımpıada oıyndarynda 2002 jyly baq synady. Sol joly jaly komandalyq esepte 10-oryn aldy. Odan keıingi kezeńde olardyń atalmysh bedeldi básekege birde-bir márte joly túsken emes. Al álem chempıonatynda top-dıvızıonda sol jyly jalpy komandalyq esepte toǵyzynshy orynǵa taban tiredi. Halyqaralyq shaıbaly hokkeı federatsııasynyń 2019 jylǵy kórsetkishi boıynsha ýkraın hokkeıshileri álemdik reıtıngte 25-orynda tur. Qazaqstan men Ýkraına quramalary 6 aqpan kúnderi ózara sheberlik baıqasady.
Elorda tórinde Nıderland quramasy da jalǵyz joldamaǵa talasady. Nıderland shaıbaly hokkeı federatsııasy 1935 jyly tusaýyn kesken. Alǵashqy qurylǵan jyly álem chempıonatynda baq synap, eń sońǵy oryndy qanaǵat tutty. Bul qurama 1980 jyly Olımpıada oıyndarynda jalpy komandalyq esepte segizinshi orynǵa qol jetkizdi. Álem chempıonatynda 1950, 1981 jyldary segizinshi oryn aldy. Aıta keterligi, Nıderland quramasy búgingi kúnge deıin 7 márte kezdesti. Onyń barlyǵynda qazaqstandyq hokkeıshiler jeńiske jetti. Halyqaralyq shaıbaly hokkeı federatsııasynyń 2019 jylǵy kórsetkishi boıynsha álemdik reıtıngte 28-orynda tur. Qazaqstan men Nıderland quramalary 7 aqpanda muz aıdynǵa shyǵady.
Polshada shaıbaly hokkeı federatsııasy 1926 jyly qurylǵan. Búgingi kúnge deıin polıak hokkeıshileri qysqy Olımpıada oıyndarynda 13 márte baq synaǵan. Bul jóninen eń joǵary jetistigi retinde 1932 jylǵy dúbirli dodada tórtinshi oryn alǵandyǵyn aıta ketkenimiz artyq bolmas. Sondaı-aq, olar 1931 jyly Polshanyń Krynıtsa-Zdrýı qalasynda ótken álem chempıonatynda alǵashqy tórtikke taban tiredi. Al 1929 jyly Eýropa chempıonatynda fınalda Chehoslovakııadan 1:2 esebimen jeńilip, kúmis júldeni qanaǵat tutty. Halyqaralyq shaıbaly hokkeı federatsııasynyń 2019 jylǵy kórsetkishi boıynsha olar álemdik reıtıngte 22-orynda tur. Aıta keterligi, 1994-2018 jyldar aralyǵynda olar Olımpıadaǵa joldamaǵa qol jetkize almaı keledi. Qazaqstan men Polsha quramalary 9 aqpan kúnderi kezdesedi.
Óz tobynda qazaqstandyq hokkeıshiler birinshi oryn alýy tıis. Sol arqyly irikteý kezeńiniń fınaldyq satysyna joldama alady. Jarystyń atalmysh satysynda qazaqstandyq hokkeıshiler 2020 jyldyń 27-30 tamyz aralyǵynda Slovakııa, Norvegııa, Latvııamen sheberlik baıqasady.
Qazaqstan quramasy Qysqy Olımpıada oıyndarynda eki márte baq synady. 1998 jyly shırek fınalǵa deıin jetse, 2006 jyly jalpy esepte toǵyzynshy oryn aldy.