Qazaqstan halyqaralyq júk jóneltilimi ınfraqurylymyn damytýda 81-orynda tur

ASTANA. QazAqparat - Qazaqstan halyqaralyq júk jóneltilimi ınfraqurylymyn damytýda 81-orynda tur. Bul týraly Adani Group logıstıka bólimshesiniń jetekshisi Sandıp Mehta aıtty, dep habarlaıdy QazAqparat tilshisi.

«Eger jahandyq statıstıkaǵa kóz salar bolsaq, Qazaqstan júk tasymalyna qatysty jalpy ındekste 71-orynda, ınfraqurylymdy damytýda 81-orynda jáne halyqaralyq júk jóneltiliminde 84-orynda tur. Óıtkeni, Qazaqstannyń teńizge shyǵatyn joly joq», - dedi ol «Kazakhstan Global Investment Roundtable» jahandyq ınvestıtsııalar jónindegi dóńgelek ústel otyrysynda.

Osy oraıda, sheteldik kompanııa ókiliniń dereginshe, jahandyq saýda-sattyqtyń 80 paıyzy teńiz baǵyty arqyly ótedi.

«Buǵan qosa, biz temir jol kóligimen jáne qubyrmen tasymaldy da eskergenimiz jón. Óıtkeni, Qazaqstan munaıly el sanalady», - dedi Sandıp Mehta.