Qazaqstan Halyqaralyq kınologııa federatsııasyna múshe boldy

ASTANA. QazAqparat - Qazaqstan kınologtary odaǵy Halyqaralyq kınologııa federatsııasynyń (FCI) múshesi atandy, dep habarlaıdy QazAqparat.

Súıinshi jańalyqty Prezıdenttiń is basqarýshysy Aıbek Dádebaev jetkizdi.

«Halyqaralyq kınologııa federatsııasy (FCI) Bas Assambleıasynyń otyrysynda Qazaqstan kınologtary odaǵy osy uıymnyń tolyqquqyly múshesi dep tanyldy. Búgin Jenevadaǵy jıynda daýys berý rásimi ótip, 77 múshe memlekettiń 72-si qazaqstandyq uıymnyń kandıdatýrasyna qoldaý bildirdi. Osy iske atsalysqan memlekettik qyzmetkerlerge, dıplomattarǵa, qoldap daýys bergen elderge jáne FCI basshylyǵyna shynaıy alǵysymdy aıtamyn», - dep jazdy ol Telegram paraqshasynda.

Qazaqstan kınologtary odaǵy úshin bul óte mańyzdy jetistik ekeni sózsiz. Sonyń arqasynda qazaqy ıt tuqymdaryn halyqaralyq deńgeıde tanytýǵa jol ashylyp otyr.

«Osy oraıda qazaqy tazy men tóbetti saqtaý men qalpyna keltirý, olardy tóltýma qazaqy ıt tuqymdary retinde tanytý máselesine Memleket basshysy Qasym-Jomart Toqaevtyń nazar aýdarǵanyn atap ótkim keledi. Prezıdent «Tazy - halqymyzdyń jeti qazynasynyń biri, sondyqtan bul asyl tuqymdy ıtti joǵaltyp almaýymyz kerek. Úkimet pen qoǵamdyq uıymdar birlesip, tıisti is-sharalardy qoldanýy qajet» degen bolatyn. Memleket basshysynyń tapsyrmasy boıynsha, byltyr Prezıdent Іs basqarmasy osy máseleni qolǵa alyp, memlekettik organdardyń jumysyn úılestirýmen aınalysty. Jumys toby qurylyp, Ekologııa jáne tabıǵı resýrstar mınıstrligi ókiletti organ retinde bekitildi. Ulttyq qundylyǵymyz sanalatyn ıt tuqymdaryn qorǵaýǵa baǵyttalǵan zań qabyldandy. Endi mine, Jenevadan jetken jańalyqtyń arqasynda qazaqy tazy men tóbetti halyqaralyq deńgeıde tanytýǵa baǵyttalǵan úlken qadam jasaldy. Aldaǵy ýaqytta Halyqaralyq kınologııalyq federatsııamen, sonyń ishinde standarttaý jónindegi komıssııamen tyǵyz baılanysta jumys atqarylýy kerek. Ekologııa jáne tabıǵı resýrstar mınıstrligi óz kezeginde Ulttyq tazy men tóbet ortalyǵynyń jumysyn jolǵa qoıyp, ǵylymı zertteýlerdi, saladaǵy máselerdi júıeli túrde sheshýdi qolǵa alady dep josparlanyp otyr», - deıdi Aıbek Dádebaev.

Eske sala keteıik, buǵan deıin Jenevada uıymdastyrylatyn «World Dog Show-2023» ıtter kórmesine Qazaqstannan eki tazy qatysatynyn habarlaǵan edik.

Keshe Jenevadaǵy osy jıynda Qazaqstannyń Halyqaralyq kınologııa federatsııasyna qosylý máselesi talqylandy.