Qazaqstan Halyq partııasynyń basshysy baspasóz máslıhatyn ótkizdi

NUR-SULTAN. QazAqparat – Búgin Qazaqstan Halyq partııasynyń uıymdastyrýymen baspasóz máslıhaty ótti. Onda partııa tóraǵasy qoǵamdyq uıymnyń jumysy men «URANkz» respýblıkalyq qoǵamdyq birlestigimen áriptestigi týraly áńgimeledi, dep habarlaıdy QazAqparat.

«Biz jýyrda ataýymyzdy ózgerttik. Endigi ýaqytta Qazaqstannyń Halyq partııasy dep atalady. Degenmen biz óz ıdeologııamyzdan aýytqyǵan joqpyz. Biz tek bolashaq baǵyt-baǵdarymyzdy qaıta qarap, ózgerttik. Taǵy bir jańashyldyq URANkz respýblıkalyq qoǵamdyq birlestigimen ózara qyzmet etip jatyrmyz», - dedi Qazaqstan Halyq partııasynyń tóraǵasy Aıqyn Qońyrov elordada ótken baspasóz máslıhatynda.

Sondaı-aq, atalǵan is-sharada URANkz respýblıkalyq qoǵamdyq birlestiginiń «Qyzyl avtobýs» aktsııasynyń qyzmeti sóz boldy. «Qyzyl avtobýs» aktsııasy aıasynda onyń ókilderi SQO, Atyraý jáne Aqtóbe oblysynda bolǵandyǵyn aıtty. Onda ókilder «Eńbek» baǵdarlamasy aıasynda SQO-da salynǵan turǵyn úılerdiń jaǵdaıymen tanysqan. Sonymen qatar, sol oblystaǵy Stanovoe aýylynda, Aqtóbe oblysynyń Qarǵaly aýylynda bolyp, áleýmettik máselelerimen tanysqan.