Qazaqstan halyq partııasy aralyq qorytyndyny shyǵardy

ALMATY. QazAqparat - Búgin Almatyda Qazaqstan Halyq partııasynyń saılaýaldy shtabynyń keńsesinde qalalyq máslıhat depýtattyǵyna kandıdattar men partııa kóshbasshylarynyń onlaın konferentsııasy ótti, dep habarlaıdy QazAqparat.

QHP músheleri saılaý naýqanynyń aralyq qorytyndysyn shyǵaryp, aldaǵy QR Parlamenti Májilisi men máslıhat saılaýyna daıyndyq jónindegi jumys josparyn talqylady.

Ózekti máselelerdi talqylaýǵa Qazaqstan Halyq partııasy kóshbasshylarynyń biri Jambyl Ahmetbekov qatysyp, sóz sóıledi.

Ol memleket ónimdi jáne laıyqty aqy tólenetin eńbek quqyǵyn qamtamasyz etýi tıis ekenin málimdedi.

– Ekonomıka ósimdi kórsetse de, halyq muny sezbeıdi. Biz ónimderdi, taýarlardy, jabdyqtardy ımporttaımyz jáne baǵanyń úzdiksiz ósýin baıqaımyz. Qazaqstandyqtardyń dollardaǵy ortasha tabysy 2008 jyldan beri ósip kele jatqan joq. Qazaqstanǵa halyqtyq ekonomıka qajet. Mundaǵy negizgi basymdyq – JІÓ-niń ósýi emes, turaqty jumyspen qamtý jáne halyq tabysynyń ósýi, – dep pikir bildirdi Qazaqstan Halyq partııasynyń kóshbasshysy.

Jambyl Ahmetbekov áriptesterine QHP saılaýaldy baǵdarlamasynyń negizgi tarmaqtaryn eske saldy.