Qazaqstan halqynyń birligi kúni álemniń on alty eli onlaın bas qosady

NUR-SULTAN. QazAqparat - Álemniń túrli elderindegi kórermen qaýym, onyń ishinde Brazılııa, Argentına, Bolıvııa, Venesýela, Kolýmbııa, Paragvaı, Perý, Ýrýgvaı, Chılı, Ekvador, sondaı-aq Reseı, Polsha, Belgııa, Sıngapýr, Shvetsııa men Avstralııada mekendeıtin otandastarymyz Qazaqstan halqynyń birligi merekesi aıasynda «Astana Opera» teatrynyń eksklıýzıvti spektaklderin tamashalaı alady.

Bul týraly QazAqparat teatrdyń baspasóz qyzmetine silteme jasap habarlaıdy.

Opera jáne balet spektaklderiniń onlaın kórsetilimi elordalyq teatrdyń YouTube platformasynda kórsetiledi, sonymen qatar taratylymnyń ýaqyty men kúni týraly tolyq aqparatty álemniń 16 elindegi Qazaqstan Respýblıkasy Elshiliginiń ókilderi taratyn bolady.

- Adamdardy mádenıet sııaqty eshnárse toptastyryp, biriktire almaıdy, sondyqtan biz Qazaqstan halqynyń birligi kúni álemniń ár buryshynda spektaklderimizdiń onlaın kórsetilim jobasyn júzege asyrý týraly sheshim qabyldadyq. Oǵan 16 el qatysady, alǵashqylardyń biri bolyp Qazaqstan Respýblıkasynyń Reseı, Brazılııa, Polsha men Shvetsııadaǵy Elshilikteri kelisim bildirdi. Onlaın-afıshaǵa 5 spektakl endi – 28 sáýir kúni ótetin A.Adannyń «Korsar» baleti, kelesi kúni jurtshylyq nazaryna P.I.Chaıkovskııdiń «Aqqý kóli» tanymal baleti usynylmaq, opera ónerin súıer qaýym úshin 30 sáýirge Dj. Pýchchınıdiń «Týrandot» spektaklin ázirledik. Al 1 jáne 2 mamyr kúnderi halyqaralyq aýdıtorııamyzdy álemdik horeografııa jaýharlary – L.Mınkýstyń «Don Kıhot» jáne A.Adannyń «Korsar» baletterimen qýantpaqpyz, - dedi Qazaqstannyń eńbek sińirgen qaıratkeri, «Astana Opera» teatrynyń dırektory Ǵalym Ahmedıarov.

- Elimizdiń barlyq turǵyndaryn tamasha, jarqyn ári izgi mereke – Qazaqstan halqynyń birligi kúnimen shyn júrekten quttyqtaımyn. Osy kúni árbir otbasyna myqty densaýlyq, amandyq, beıbitshilik pen gúldený tilegim keledi. Qazaqstan – shamamen 125 ult pen ulys meken etken kópultty memleket. El táýelsizdiginiń 30 jyly ishinde qazaqstandyqtardyń beıbitshilik pen kelisimde turyp jatqandyǵy qýantady. Barshamyzdyń mýzykaǵa degen mahabbatymyz birligimizdi arttyra bersin, - dep sózin qorytyndylady teatr dırektory.

Barlyq onlaın kórsetilimder shyǵarylǵan kúni saǵat 00.00-den bastap kelesi kúni saǵat 9.00-ge deıin teatrdyń YouTube-arnasynda Qazaqstan elshilikteriniń resmı derekkózderindegi siltemeler boıynsha qoljetimdi bolady.

Onlaın spektaklderden bólek, elorda turǵyndary men qonaqtaryna 1 mamyrda «Astana Operanyń» Kameralyq zaly sahnasynda ótetin «Mahabbat pen dostyq úni» merekelik kontserti usynylady.

Oǵan opera solısteri men orkestr ártisteri qatysady. Baǵdarlamaǵa qonaqjaı qazaq jerinde, bir shańyraq astynda tatý-tátti ómir súrip kele jatqan ulystardyń romanstary, halyq ánderi, aspaptyq mýzykasy engen. Ulttyq mýzykalyq dástúrlerdiń san alýandyǵy kórermenderge merekelik kóńil-kúı syılaıtyny anyq.

Karantın kezinde teatrǵa kelý «Ashyq» qosymshasy arqyly júzege asyrylatyndyǵyn eske salamyz.