Qazaqstan halqynyń 97 paıyzy belgili bir dindi ustanady – Senat depýtaty
«Táýelsizdik jyldary Qazaqstan álemdik qoǵamdastyq moıyndaǵan, dinaralyq jáne konfessııaaralyq dıalog pen kelisimdi qamtamasyz etýde tabysqa jetýdiń biregeı tájirıbesi bar demokratııalyq, zaıyrly, quqyqtyq jáne áleýmettik memleket retinde qalyptasty. Elimizde búkilqazaqstandyq birliktiń biregeı modeli – Qazaqstan halqy Assambleıasy quryldy, onyń basty mindeti elimizdegi qoǵamdyq-saıası turaqtylyqty qamtamasyz etý jónindegi memlekettik ulttyq saıasatty iske asyrý jáne etnosaralyq qatynastar salasynda memlekettik jáne azamattyq ınstıtýttardyń ózara is-qımylynyń tıimdiligin arttyrý», - dedi D. Nóketaeva búgin astanada ótip jatqan Álemdik jáne dástúrli dinder lıderleri seziniń sessııalyq otyrysynda.
Óz sózinde depýtat birlik, kelisim jáne beıbitshilik – eldiń myzǵymas qundylyqtary ekenin, basty qaǵıdatymyz – áralýandyq birliginen esh aýytqymaıtynyn atap ótti.
«Elimizde memlekettik-konfessııalyq ózara qarym-qatynastardyń zaıyrly modeli qalyptasqan, osylaısha barlyq azamattar tili men dinı senimine qaramastan zań aldynda teń jáne árbir azamattyń dinı nanymdaryna qurmetpen qaraý qaǵıdaty bar. El Konstıtýtsııasy Qazaqstandy zaıyrly memleket retinde aıqyndaıdy. Respondentter saýalnamasyna sáıkes, eldegi halyqtyń basym kópshiligi, dálirek aıtqanda 97 paıyzy ózderin belgili bir dinge jatqyzady. Respondentterdiń tek 3 paıyzy ǵana dinge senbeıtinin aıtqan nemese qoıylǵan suraqqa jaýap berýden bas tartqan», - dedi D. Nóketaeva.
Sonymen birge depýtat ǵasyrlar boıy qazaqtardyń tarıhı jerinde túrli mádenıetter, dinder men dástúrler toǵysqanyn aıtty. Sonyń nátıjesinde qazaqtarmen birge 140-tan astam etnos pen 40 konfessııanyń ókilderi beıbit ómir súrip jatqan biregeı jaǵdaı qalyptasty.
«Táýelsizdik jyldary Qazaqstanda dinniń naǵyz renessansy boldy. Egemendik alǵan soń Qazaqstan halqynyń ortaq qundylyqtary – óz taǵdyryn erkin tańdaý, jańa memleket qurýǵa qatysý, el taǵdyry men bolashaq urpaq úshin birlesken jaýapkershilik boldy. Túrli etnostardyń uzaq ýaqyt birge ómir súrýi qoǵamda turaqty toleranttylyq dástúrlerin qalyptastyrdy. Qazaqstandyqtarda barlyq etnostar, konfessııalar men áleýmettik toptar ókilderiniń ómir saltyna, ádet-ǵurpyna, sezimderine, pikirlerine, ıdeıalaryna, nanymdaryna qatysty toleranttylyq deńgeıi joǵary», - dedi Dınar Nóketaeva.
Eldegi ulttyq birlikti qamtamasyz etýdiń basty faktorlarynyń biri – jas qazaqstandyqtardy toleranttylyq pen kelisim qundylyqtaryna tárbıeleý. Bul baǵytta memleket barlyq deńgeıdegi úzdiksiz bilim berý júıesine arnalǵan etnomádenı bilim berýdi engizip jatyr.
«Mektepke deıingi, orta, kásiptik-tehnıkalyq oqytý mekemeleri men joǵary oqý oryndarynda etnomádenı toleranttyq boıynsha ınteraktıvti bilim beriledi. Mektepterde fakýltatıvtik-oqý kýrsyn, dintaný negizderin oqytý úshin, óskeleń urpaqtyń din máselelerinde habardar bolý jáne bilim deńgeıin arttyrý úshin jaǵdaı jasalǵan. Qazaqstanda dinı qyzmet jáne dinı birlestik týraly zań bar. Bul zań ár adamnyń dinı senim bostandyǵyna quqyǵyn nyǵaıtady, ár adamnyń dinı nanymynyń teń quqyly bolýyna kepildik beredi», - dedi Senat depýtaty.
Aıta keteıik, búgin elordada Álemdik jáne dástúrli dinder lıderleriniń VII sezi jalǵasýda. Onda «Bilim men dinı aǵartýdyń dinder men mádenıetterdiń syılastyqta qatar ómir súrý jáne beıbitshilik pen kelisimdi nyǵaıtýdaǵy róli» atty sektsııasy ótip jatyr.
Foto: senate.parlam.kz