Qazaqstan halqynyń 96 paıyzy aýyz sýmen qamtylǵan – statıstıka

ASTANA. QazAqparat – 2025 jyly Qazaqstan halqy sapaly aýyz sýmen 100% qamtamasyz etiledi. Bul týraly QR IIDM Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Ázimbek Pazylbekuly aıtty, dep habarlaıdy QazAqparat tilshisi.

2000-shy jyldardan bastap azamattarymyzdy aýyz sýmen qamtamasyz etý boıynsha túrli baǵdarlamalar arqyly jumys júrip jatyr.

«Aýyz sý», «Aqbulaq», «Óńirlerdi damytý», «Nurly jer» baǵdarlamalary arqyly halyqty aýyz sýmen qamtamasyz etý kórsetkishi 96,8%-dy qurady.

«ıAǵnı elimizde jalpy halyq sany 19,7 mln adam bolsa, sonyń 19,1 mln halqy sýmen qamtamasyz etilgen. Qalǵan 600 myńdaı azamat 2025 jyldyń sońyna deıin tolyqqandy aýyzsýmen qamtylady», - dedi Á. Pazylbekuly ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, tuşy jerasty sýynyń negizgi resýrstary (57%) ońtústik aımaqtarda shoǵyrlanǵan.

Al Atyraý, Soltústik Qazaqstan, Mańǵystaý, Qostanaı jáne Aqmola oblystarynda tuşy jerasty sýynyń resýrstary shekteýli.

«Mundaı jaǵdaı halyqty sapaly aýyz sýmen qamtamasyz etý jónindegi mindetterdi josparlaý men iske asyrý kezinde bizge erekshe jaýapkershilikti júkteıdi, óıtkeni bizdiń aldymyzda 2025 jyly sapaly aýyz sýmen 100% qamtamasyz etý mindeti tur. Bul kórsetkishke «Turǵyn úı-kommýnaldyq ınfraqurylymdy damytý» tujyrymdamasy sheńberinde qol jetkizý josparlanǵan. Jalpy, Sý kodeksine sáıkes, bizdiń mınıstrlik eldi mekender sheginde, al Ekologııa jáne tabıǵı resýrstar mınıstrligi – toptyq sý qubyrlaryn salý jáne rekonstrýktsııalaý jónindegi jobalardy eldi meken sheginen tys iske asyrady. Bul rette Úkimet apparaty eki memlekettik organnyń jumysyn úılestiredi. Qazirgi ýaqytta Prezıdent tapsyrmasyna sáıkes jańa Sý kodeksi jasalyp jatyr, jyl sońyna deıin Parlamentke engizý josparlanǵan», - dedi komıtet ókili.