Qazaqstan halqynyń 71 paıyzy Elbasy Joldaýynan habardar

ASTANA. QazAqparat - Qazaqstan Prezıdenti Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynan el halqynyń 71 paıyzy habardar. Bul týraly búgin «Nur Otan» partııasynyń hatshysy Qanybek Jumashev aıtty, dep habarlaıdy QazAqparat.

«Aǵymdaǵy jyldyń 13-14 qańtarynda «Nur Otan» partııasynyń Saıası saraptama jáne strategııalyq zertteýler ortalyǵy halyqtyń Joldaýdan qulaǵdar ekendigin zerdeleý maqsatynda saýalnama júrgizdi. Saýalnamaǵa qatysqandardyń 78 paıyzy Memleket basshysynyń beıne úndeýin kórse,71 paıyzy Joldaý jaıynda biledi. Buǵan qosa, saýalnama qatysýshylardyń 22 paıyzy Joldaýdy televızııalyq jańalyqtardan, 15 paıyzy áleýmettik jelilerden bilgen. Al 9,5 paıyzy Joldaý mátinimen tolyqtaı tanysyp shyqqan. Tolyqtaı alǵanda Nursultan Nazarbaevtyń Joldaýy elimizdiń túpkir-túpkirine tolyqtaı jetti jáne halyq tarabynan qoldaýǵa ıe dep sanaýǵa barlyq negiz bar», - dedi ol.

Onyń aıtýynsha, «Nur Otan» partııasy Qazaqstan Prezıdentiniń Joldaýyn túsindirý jáne nasıhattaý boıynsha belsendi jumystar júrgizýde. Joldaý jarııa etilgennen keıin birinshi jartyjyldyqqa arnalǵan respýblıkalyq jáne óńirlik deńgeıdegi is-sharalar jospary qaıta jasalǵan. Nátıjesinde barlyq partııalyq jumystardyń 41 paıyzy Joldaýdy túsindirýge baǵyttalǵan.

«Qazirdiń ózinde 5300-den astam shara ótkizildi. Oǵan shamamen 400 myń adam qatysty», - dedi ol.