Qazaqstan halqynyń 48 paıyzy jumyspen qamtylǵan - G. Ábdiqalyqova

ASTANA. 16 mamyr. QazAqparat /Qanat Mámetqazyuly/ - Qazaqstan halqynyń 48 paıyzy jumyspen qamtylǵan. Búgin QR Parlamentiniń Májilisinde «Jumyspen qamtý - 2020» baǵdarlamasy taqyrybynda ótip jatqan Úkimet saǵatynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.

«Údemeli ındýstrııalyq-ınnovatsııalyq damý baǵdarlamasyn iske asyrý, óz kezeginde jańa jumys oryndaryn qurýǵa, halyqty jumyspen qamtýǵa yntalandyrýdyń jańa tetikterin iske qosýǵa múmkindik beredi. Bul rette ındýstrııalandyrý kartasy sheńberinde 370 myńǵa jýyq jumys orny qurylmaq. Jańa nysandardyń qurylysy kezeńinde 207 myń adam oǵan tartylyp, keıinnen jańa kásiporyndarynda 161 myń jańa turaqty jumys oryndary qurylady»,-dedi mınıstr.

Onyń aıtýynsha, elimizdegi ındýstrııalyq-ınnovatsııalyq saıasatty tıimdi júzege asyrý eń aldymen eńbek resýrstaryna, olardyń sany men sapaly qamtylýyna baılanysty bolmaq. «Qazaqstan halqynyń sany 2011 jylǵy 1 qańtar boıynsha 164 mln. adamǵa jetti. Halyqtyń 48 paıyzdan astamy -eńbekpen qamtylǵandar. Onyń ishinde jalpy halyq sanyndaǵy jaldamaly jumysshylardyń úlesi 31,7 paıyzdy, ózin-ózi jumyspen qamtyǵandar 16,5 paıyzdy quraıdy»,-dedi G. Ábdiqalyqova