«Qazaqstan halqyna» qorynyń tujyrymdamasy jańartyldy
«Qazaqstan halqyna» qory basqarma tóraǵasynyń aıtýynsha, uıym jumysyn jetildire túsý maqsatynda bıyl 1 shildeden bastap 1 173 úkimettik emes uıym ókilderiniń qatysýymen 43 jıyn ótken. Olarǵa jergilikti atqarýshy organdar, bıznes jáne azamattyq qoǵam ókilderi qatysyp, 592 usynys aıtyldy.
«Qazaqstan halqyna» qoǵamdyq qory qyzmetiniń neǵurlym ózekti baǵyttary boıynsha úkimettik emes uıymdardyń usynystaryn zerdeleý maqsatynda 18 shilde men 31 tamyz aralyǵynda onlaın-saýalnama júrgizdik. Saýalnama arnaıy platformada júrgizilip, oǵan 1 041 respondent qatysty. Nátıjesi bizdiń saıtta jarııalandy. Sonymen qatar, barlyq múddeli taraptardyń ustanymdaryn anyqtaý úshin qor donorlary keshendi zertteý júrgizdi. Donorlardyń usynystary qordyń jańartylǵan tujyrymdamasynda kórsetilgen», - dedi «Qazaqstan halqyna» qoǵamdyq qorynyń basqarma tóraǵasy Bolat Jámishev uıymnyń elordada ótip jatqan qorytyndy otyrysynda.
Onyń aıtýynsha, tujyrymdamany jańartýǵa Memleket basshysynyń bıyl 11 qańtardaǵy Parlament Májilisiniń otyrysynda «Qazaqstan halqyna» qoryn qurý týraly bergen tapsyrmasy negiz boldy.
Jańartylǵan tujyrymdamaǵa sáıkes, qor qaıyrymdylyq salasyna iri jeke kapıtaldyń turaqty aǵymyn qamtamasyz etetin donorlyq pen qaıyrymdylyq ekojúıesiniń draıveri atanýy tıis.
Osy oraıda, qoǵamdyq sektor uıymdarynyń kómegimen qaıyrymdylyq baǵdarlamasy ázirlenip, iske asyrylady. Sondaı-aq, otandyq mamandar men óndirýshilerdi qoldaýǵa basymdyq beriledi.
«Qazaqstan halqyna» qory áleýmettik mańyzdy nysandardy materıaldyq-tehnıkalyq jabdyqtaý boıynsha kómek kórsetýdi jalǵastyrady. Sonymen qatar, resmı jáne beıresmı bilim berýdi keńeıtýge járdemdesýge, halyqqa áleýmettik qyzmetter kórsetýdiń qoldanystaǵy júıeleriniń, quraldary men úderisteriniń tıimdiligin arttyrýǵa qatysady.
Odan bólek, qor áleýmettik ınnovatsııalardy qoldaý jáne engizý, kómekke muqtaj jekelegen azamattardy maqsatty demeý jáne tótenshe jaǵdaılar kezinde keshendi kómek kórsetý qyzmetin odan ári jalǵastyrady.