«Qazaqstan halqyna» qoryna aýdarǵan qarjyny keri qaıtaryp alýǵa bola ma

NUR-SULTAN. QazAqparat – Qaıyrymdylyq jasap, qorǵa aýdarǵan aqshany keri qaıtaryp alý múmkindigi bar ma? Bul suraqqa «Qazaqstan halqyna» qorynyń tóraǵasy Bolat Jámishev jaýap berdi, dep habarlaıdy QazAqparat tilshisi.

«Qordyń bıýdjetin qamqorshylyq keńes bekitedi. Eger qorǵa qarjy aýdarylyp, keıin aýdarǵan adam belgili sebeppen aqshasyn qaıtaryp alǵysy kelse, problema joq. Qarjy ıesine qaıtarylady. Al eger jeke tulǵa nemese uıym óz erkimen qaıyrymdylyq jasasa, onda másele joq. Biz erkinen tys qaıyrymdylyq jasaýǵa qarsymyz. Bireýden qınap aqsha jınalmaýyn talap etemiz. Bul - aqylǵa syımaıtyn jaıt. Jeke óz basym, qor basshysy retinde de eriksiz qarjy jınaýǵa qarsymyn», - dedi Bolat Jámishev «Oshakbaev LIVE» telebaǵdarlamasynyń efırinde.

Sondaı-aq, atalǵan telebaǵdarlamanyń qonaǵy bolǵan QR Parlamenti Májilisiniń depýtaty, «Qazaqstan halqyna» qory qamqorshylyq keńesiniń múshesi Irına Smırnova qaıyrymdylyq jasaýǵa qatysty óz pikirin bildirdi.

«Men halyqtan qarjy jınaýǵa qarsymyn. Maǵan mektep kezinen bastap aqsha jınaý degen unamaıtyn. Qarapaıym adamdardan aqsha jınaý qordyń jumysyna abyroı bermeıdi. Memleket basshysy qor jumysyna qatysty naqty aıtyp ótti, baıyp, masaıǵan adamdardyń halyqqa kómek kórsetetin ýaqyty keldi dedi. Qorǵa qarjyny erkinen tys aýdartyp jatyr degen shaǵym da túsip jatyr. Men májbúrleýge qarsymyn. Qor jumysy aıaqqa basyp, el ıgiligin kóre bastaǵanda qaıyrymdylyq kórsetkisi kelgen jandar ózderi-aq túsinedi. Sondyqtan bireýdi qınaýdyń qajeti joq. Eriksiz aýdarylǵan qarjyny qaıtaryp berý kerek», - deıdi ol.