«Qazaqstan halqyna» qory aýtıst balalar sany eń kóp 8 óńirde ońaltý ortalyqtaryn ashady
«Qazaqstan halqyna» qorynyń «Qamqorlyq qory» jáne «Samruk-Kazyna Trust» qorlarymen birlesip iske asyratyn «Aýtızmi jáne basqa da mentaldy buzylystary bar balalarǵa arnalǵan ortalyqtardy jaraqtandyrý» qaıyrymdylyq jobasy aıasynda elimizde osyndaı 8 ortalyq ashylady. Joba bıýdjeti – 2,4 mlrd teńge.
Ortalyqtyń ereksheligi – ár túrli beıindi mamandarmen kórsetiletin kómektiń keshendi sıpaty, erte kómek kórsetý, balalardyń halyqaralyq ǵylymı-dáleldi ádistemeler negizinde áleýmettik ózara is-qımyl jáne kommýnıkatsııa daǵdylaryn damytý, sondaı-aq áleýmettik qorǵaý mamandaryn oqytýdy júrgizý.
«Sońǵy bes jylda aýtızmi bar balalardyń sany eki esege artyp, búginde elimizde aýtızm spektri buzylǵan 12 myńnan astam bala bar. Mundaı dıagnoz qoıylǵan bala sanynyń ósýi sáıkesinshe qajetti ınfraqurylymdy, jaǵdaıdyń jasalýdy qajet etedi. Keshendi jáne uzaq merzimdi kómek joq, ata-analar men balalar túzetý kabınetine nemese ońaltý ortalyǵyna kezek kútýge májbúr. Osy jáne basqa da máselelerdi ata-analar men azamattyq sektor ókilderi bizge jibergen ótinishteri men usynystarynda baıandaǵan bolatyn. Sondyqtan máseleniń mańyzdylyǵyn eskere otyryp, seriktesterimizben ony júıeli túrde sheshýge bastamashy boldyq. Maqsat – balalar men ata-analarǵa keshendi jáne uzaq merzimdi qoldaý kórsetý, qoǵamda áleýmettenýine jaǵdaı jasaý. Osylaısha aýtızmi bar balalar sany eń kóp 8 óńirde 8 ortalyq qurylyp, onda jyl saıyn 1000 erekshe bala qamtylady», – dep atap ótti «Qazaqstan halqyna» qorynyń basshysy Bolat Jámishev.
Eńbek jáne halyqty áleýmettik qorǵaý mınıstrliginiń málimetinshe, Shymkentte aýtızm spektri buzylǵan 220-dan astam bala tirkelgen.
Jańa ortalyqta AVA terapııasy, kásiptik terapııa, kınezıoterapııa, adaptıvti jáne emdik dene shynyqtyrý, kásiptik terapııa, art-terapııa, mýzykalyq terapııa, keramıka, ata-analarmen jumys, sensorlyq ıntegratsııa, áleýmettik-turmystyq baǵdarlaý sabaqtary, logoped, psıholog jáne defektolog sııaqty túrli qarqyndy oqytý baǵdarlamalary, terapııa jáne ońaltý ádister kózdelgen.
Joba bastamashysy – «Qamqorlyq qory» balalarmen jumys isteý maqsatynda aýtızmi jáne basqa da mentaldy buzylystary balalardy ońaltý salasyndaǵy mamandardy otandyq jáne sheteldik sarapshylardyń kýrstary, trenıngteri, kóshpeli semınarlardy qamtıtyn arnaıy ázirlengen baǵdarlama boıynsha oqytyp, daıarlady.
«Qazaqstan halqyna» qory jáne «Samuryq-Qazyna» AQ kompanııalar tobynyń biryńǵaı qaıyrymdylyq operatory – «Samruk-Kazyna Trust» áleýmettik jobalardy damytý qorymen ortalyqtardyń materıaldyq-tehnıkalyq jabdyqtalýyn qarjylandyrdy.
Eńbek jáne halyqty áleýmettik qorǵaý mınıstrligi jobany iske asyrý máselelerinde óńirlik jumyspen qamtý jáne áleýmettik baǵdarlamalar basqarmalarynyń jumysyn úılestirýdi júzege asyrady.
Ákimdikter ınfraqurylymdy irikteý, ortalyqtardy jóndeýdi qarjylandyrý, ortalyqtarda jumys isteý úshin kadrlardy irikteý boıynsha jumys júrgizýde.
Shymkentten basqa, aýtızmi bar balalarǵa arnalǵan 7 ortalyq Almaty qalasynda, Almaty, Aqtóbe, Shyǵys Qazaqstan, Jambyl, Qostanaı, Pavlodar oblystarynda ashylady.