«Qazaqstan halqyna» qory 13 syrqat balaǵa qymbat apparattar satyp aldy
«Qazaqstan halqyna» qoǵamdyq qorynyń «Tirek-qımyl apparaty buzylǵan balalardy ekzoskelettermen qamtamasyz etý» qaıyrymdylyq baǵdarlamasy aıasynda alǵashqy ekzoskelet 16 jastaǵy Asyljan Saılaýǵa berildi.
Ekzoskelettermen qamtamasyz etý jónindegi qaıyrymdylyq baǵdarlamasy tirek-qımyl apparaty buzylǵan (tserebraldy sal aýrýy, mı jaraqattary, julynnyń zaqymdanýy, paraplegııa, bulshyqet dıstrofııasy, Rett sındromy jáne taǵy basqasy) halyqtyń áleýmettik osal toptarynan shyqqan balalarǵa arnalǵan. Baǵdarlamaǵa aıasynda 13 balaǵa 117 mln teńge kóleminde qurylǵy satyp alynady: bir ekzoskelettiń quny 9 mln teńge.
Jobanyń seriktesi patsıenttik uıym bolyp tabylatyn «CyberFund» qaıyrymdylyq qory balalardyń qujattaryn ázirleýdi jáne jınaýdy júzege asyrǵan.
Ekzoskeletti óndirýshi «Mbionics» otandyq kompanııasy. Baǵdarlama aıasynda salmaǵy 25 keli bolatyn árbir qurylǵy ár balanyń jeke qajettilikteri men fızıologııalyq parametrlerin eskere otyryp jasalady. Bıiktigi 130–dan 160 sm-ge deıin jáne salmaǵy 60 kelige deıingi balalarǵa arnalǵan ekzoskelet shyǵaralady. Qurylǵynyń qyzmet etý merzimi – 5 jyl. Óndirýshi kompanııa bir jyl ishinde apparattyń jumysyna baqylaý júrgizedi.
2022 jyldyń qazan aıynyń sońyna deıin taǵy 3 balaǵa arnalǵan qurylǵyny synaqtan ótkizý josparlanýda.
Erekshe jasóspirim otbasymen birge elordada turady.
Alǵashqy ekzoskeletti alǵan Asyljan – Merýert pen Erjan Omarbekovter januıasyndaǵy bes balanyń úlkeni. Merýert Omarbekovanyń aıtýynsha, qyzy Taraz qalasynda merziminen buryn dúnıege kelgen. Sábı bir jasqa tolǵanda dárigerler tserebraldy sal aýrýy dıagnozyn qoıǵan.
«Men baǵdarlamashymyn, al jubaıym – zańger. Alaıda men Asyljandy emdeýmen aınalysqandyqtan mamandyǵym boıynsha jumys isteı almadym. Jylyna eki ret statsıonarlyq em, massaj, jattyǵý terapııasyn, ınemen em aldyq. Tegin ońaltý kezegi keıde óte uzaqqa sozylǵanda kórsetiletin qyzmetterdi tóleýge týra keletin. Eshkimge qolymyzdy jaıǵan emespiz, árqashan óz kúshimizge senip keldik. Árıne, ómirde túrli qıyndyqtardy bastan ótkerdik jáne onyń bári artta qaldy dep oılaımyn. Asyljanǵa memleketten usynylatyn tegin kómekten bólek turaqty túrde ońaltý men emdeý qajet boldy. Tarazda mundaı múmkindik bolmady. Sondyqtan jubaıym elordaǵa jumys babymen aýysqan kezde, onda Asyljannyń sapaly em alý múmkindigi kóbirek bolatynyn túsindik. Sonymen qatar qyzymyz 4 jasta boldy, qoǵamǵa úırenip, áleýmettenýdi qajet etti, balabaqshaǵa baryp, mektepke daıyndalý kerek boldy», – deıdi Asyljannyń anasy Merýert Omarbekova.
2010 jyly Omarbekovter kópbalaly otbasy jáne múgedek balany tárbıelep otyrǵan otbasy retinde turǵyn úı kezegine turdy. 2019 jyly olarǵa satyp alý quqyǵynsyz jalǵa beriletin baspana berildi. Merýerttiń aıtýynsha, ol eki jyl buryn «CyberFund» qaıyrymdylyq qory týraly estigen. Qor halyqtyń jınaǵan qarajaty esebinen joǵary tehnologııalyq ońaltý quraldaryn satyp alýǵa kómektesedi. Ol kezde qorǵa apparattar alý ótinishimen kezek kóp boldy. Asyljannyń otbasy úmitin joǵaltpady. Bıyl «CyberFund» qaıyrymdylyq qorynyń dırektory Gúlzat Myrzaǵulova qýanyshty habar jetkizdi. «Qazaqstan halqyna» qory men «CyberFund»-pen balalardy ekzoskelettermen qamtamasyz etý týraly shart jasasty. Qurylǵy kezegimen 13 balaǵa beriletin tizimde Asyljan da bar.
«Bul Asyljan úshin óte mańyzdy, sebebi ol kolledjde ınterer dızaıneri mamandyǵy boıynsha oqyp jatyr. Ózdiginen júre almaıdy. Jaqynda 17 jasqa tolady, al memleket esebinen ońalý tek 15 jasqa deıin qarastyrylǵan. Ekzoskelet oǵan kúndelikti úıde bulshyq etterdi, jambas súıekterin damytýǵa múmkindik beredi, keıipti saqtaýǵa jáne durys júrýge úıretedi. «Qazaqstan halqyna» jáne «CyberFund» qorlarynyń birlesken baǵdarlamasy Asyljannyń arman-maqsatyn oryndaýǵa jaqyndatty. Armany – óz betinshe júrý», – deıdi anasy.
Bir aıdan keıin Asyljan 17 jasqa tolady. Jasóspirimniń aıtýynsha, «ekzoskelet týǵan kúnine jasalǵan eń mańyzdy tosynsyı». Ómirinde oryn alǵan qıyndyqtarǵa qaramastan, rýhy synbaǵan. Endi qurylǵynyń kómegimen kásibı dızaıner atanyp, óz aldyna adamdarǵa úılerin jaıly ári kórkem etý mindetin qoıyp otyr.
Dárigerlerdiń pikirinshe, ekzoskeletter tirek-qımyl apparaty buzylǵan adamdarǵa arnalǵan zamanaýı, joǵary tehnologııalyq ońaltý quraldarynyń biri, sondaı-aq aýrýdyń negizgi dıagnozy aıasynda basqa asqynýlardy boldyrmaýǵa kómektesedi.