Qazaqstan halqy durys tamaqtanbaıtyn elderdiń qataryna enip otyr – DSM

NUR-SULTAN. QazAqparat –Qazaqstandyqtar tuzdy tym kóp, jemis-jıdekti óte az tutynady. Úkimet otyrysynda Dúnıejúzilik densaýlyq saqtaý uıymynyń derekterin keltirgen QR Densaýlyq saqtaý mınıstri Ajar Ǵınııat osyndaı málimdeme jasady, dep habarlaıdy QazAqparat tilshisi.

«Dúnıejúzilik densaýlyq saqtaý uıymynyń zertteýleri boıynsha, er adamdar úshin alkogoldi tutyný deńgeıi jylyna 25 lıtrdi, áıelder úshin – shamamen 9 lıtrdi quraıdy. Ókinishke oraı, osy kórsetkish boıynsha Qazaqstan alkogoldik ishimdikterdi tutyný deńgeıi joǵary elderge jatady. Kóp jaǵdaıda jol-kólik oqıǵalary, jaraqattar, zorlyq-zombylyqtan bolǵan ólim, ýlaný, sýǵa batý sııaqty syrtqy sebepterden bolatyn ólim-jitim kórsetkishteri alkogoldik ishimdikterdi tutynýdyń saldary bolyp otyr», - dedi Ajar Ǵınııat.

Sonymen qatar, ol qazaqstandyqtar arasynda tuzdy taǵamdy paıdalaný deńgeıi tym joǵary ekenine alańdaýshylyq bildirdi.

«Dúnıejúzilik densaýlyq saqtaý uıymy usynǵan norma boıynsha halyq taǵam quramynda táýligine 5 gramm tuz tutynýy qajet. Qazaqstanda bul kórsetkish 18 gramm ekenin atap ótkim keledi.

VI Ulttyq ómir saltyn zertteý derekteri boıynsha kókónister men jemisterdi tutyný – táýligine 200-230 gramdy quraıdy. Al Dúnıejúzilik densaýlyq saqtaý uıymy usynǵan norma – táýligine 400-500 gramdy quraý kerek. Qazaqstan Ortalyq Azııa men Eýropanyń durys tamaqtanbaıtyn 21 eliniń arasynda 9-shy orynda tur», - dedi mınıstr.