Qazaqstan halqy Assambleıasynyń jyly aıasynda 60-tan astam is-sharalar josparlanyp otyr

ASTANA. QazAqparat - Búgin Parlament Májilisinde Qazaqstan halqy Assambleıasy depýtattyq tobynyń kezekti otyrysy bolyp ótti. Onda Elbasynyń Jarlyǵymen 2015 jyldy Qazaqstan halqy Assambleıasynyń jyly retinde jarııalaýǵa jáne Konstıtýtsııanyń 20 jyldyǵyna arnalǵan is-sharalar jospary talqylandy.

Basqosý barysynda Qazaqstan halqy Assambleıasy Tóraǵasynyń orynbasary - Prezıdent ákimshiligi QHA Hatshylyǵynyń meńgerýshisi Eraly Toǵjanov sóz sóılep, keler jylǵa josparlarmen bólisti. Onyń aıtýynsha, qazirdiń ózinde 2015 jyly atqarylatyn 60-tan astam is-sharalar qarastyrylyp otyr. «Bunyń eń mańyzdysy - Qazaqstan halqy Assambleıasy jylynyń ashylýy. Sonymen qatar, aıtýly sharalar aıasynda -Assambleıanyń týǵan kúni, QHA mereıtoılyq sessııasy bar. Assambleıanyń Uly Jeńistiń 70 jyldyǵyna qatysýyna da erekshe mańyz beriletin bolady», - deıdi Eraly Toǵjanov.

Budan bólek, Hatshylyq meńgerýshisi Ata Zańnyń 20 jyldyǵyn merekeleýdiń mańyzyna da erekshe toqtalyp ótti.

«Dál bizdiń Ata Zańymyzda elimizdegi qoǵamdyq kelisim men turaqty damý negizderi qalanǵan bolatyn. Al Konstıtýtsııanyń kepili bul - Qazaqstan Prezıdenti, QHA Tóraǵasy Nursultan Nazarbaev», - dedi E. Toǵjanov.

Budan bólek, otyrysta depýtattar ulysaralyq toleranttylyqtyń qazaqstandyq úlgisin jetildire túsý, partııalar arasynda yntymaqtastyqty damytý baǵytynda birqatar usynystar aıtyldy.

Esterińizge sala keteıik, Elbasy Nursultan Nazarbaevtyń Jarlyǵymen 2015 jyl - Qazaqstan halqy Assambleıasy jyly dep jarııalanǵan bolatyn. Elimiz egemendik alǵaly bir shańyraqtyń astynda 140 etnos pen 17 konfessııanyń ókilderi turaqtylyq pen birlikti saqtap, tatý-tátti ómir súrip keledi. 2015 jyly Qazaqstan halqy Assambleıasyna 20 jyl tolady. Bul data QR Konstıtýtsııasynyń 20 jyldyǵymen jáne Uly Jeńistiń 70 jyldyǵymen tuspa-tus kelip otyr. Osyǵan oraı uıymdastyrylyp jatqan sharalardyń da aýqymy keń bolmaq.