Qazaqstan halqy Assambleıasynyń sessııasyna SQO-dan 37 delegat barady
Qazaqstan halqy Assambleıasy hatshylyǵynyń málimetinshe, 29 sáýir kúni Nur-Sultan qalasynda ótetin jıyn «Beıbitshilik pen kelisim formýlasy: áleýmettik birlik jáne jańǵyrtý» taqyrybynda ótpek.
Jastar jyly bolǵandyqtan, bıyl basymdyq QHA Jastar qanatyna berilgen, baratyn delegattardyń teń jartysy - belsendi jastar. Sondaı-aq, ádettegideı oblystyq ulttyq-mádenı ortalyqtar jetekshileri, Analar keńesi, ǵylymı-saraptamalyq toptardyń ókilderi jáne medıatorlar barady.
Qazir oblysta 25 etno-mádenı ortalyq bar. Ázerbaıjan ulttyq mádenı ortalyǵy óńirde 1995 jyly alǵashqylardyń biri bolyp ashylǵan. Onyń jetekshisi Shyńǵys Kýrbanov bıyl da delegatsııa quramynda sessııa otyrysyna qatyspaqshy.
«Jylda oblystyq delegatsııa quramynda sessııaǵa qatysyp júrmin. Elbasy, Qazaqstan halqy Assambleıasynyń tóraǵasy Nursultan Nazarbaev eń aldymen bizge elimizdiń basty baılyǵy - birlik pen kelisimdi saqtaý, nyǵaıtý mindetterin qoıdy. Jalpy, biz ázerbaıjandyqtar Kóshbasshy ustanǵan baǵytty qoldaımyz. Byltyr QHA-nyń XXVI sessııasynda Elbasy bes áleýmettik bastamany usynǵan bolatyn. Qazaqstandyqtardyń turmysyn jaqsartýǵa baǵyttalǵan baǵdarlama elimizde júıeli túrde júzege asyrylyp jatyr. Bıyl sessııa mańyzdy naýqan - prezıdent saılaýy aldynda ótkeli tur, sondaı-aq bıyl - Jastar jyly. Sol sebepti jıynda osy taqyryptar qamtylady dep oılaımyn», - deıdi Shyńǵys Kýrbanov.