Qazaqstan halqy Assambleıasynyń qyzmeti men jaýapkershiligi artady

ASTANA. QazAqparat - Búgin Senattyń Áleýmettik-mádenı damý jáne ǵylym komıtetiniń keńeıtilgen otyrysynda  «Qazaqstan halqy Assambleıasy týraly» QR Zańyna ózgerister men tolyqtyrýlar engizý týraly» zań jobasy talqylandy, dep habarlaıdy QazAqparat tilshisi.

«Joba aıasynda atalǵan Zańǵa birqatar túzetýler men jańadan tórt bap engizilip otyr. Atap aıtqanda, zańda qoldanylatyn termınologııa retteldi. Búgingi qoǵamda Assambleıanyń róli eskerilip, «etnosaralyq kelisimdi qamtamasyz etý» degen termın «qoǵamdyq kelisim men jalpyulttyq birlikti qamtamasyz etý» dep aýystyryldy», - dep toqtaldy QR Mádenıet jáne sport vıtse-mınıstri Aqtoty Raıymqulova.

Kelesi ózgeristerdiń biri  - ol Assambleıanyń quramyna qatysty.

«Qoldanystaǵy zańda Assamblenyń quramyn tek onyń sessııasy, keńesi, apparaty jáne oblys Assambleıalary quraıtyn. Joba aıasynda bul tizimde Assambleıanyń atqarýshy organy men etnomádenı birlestigi keńeıtilip otyr. Budan basqa, Assambleıa Keńesiniń sapalyq quramyn arttyrý qaralýda. Búginde Keńes etnomádenı birlestik ókilderi qatarynan qalyptasyp kelgenin bilesizder. Al jobada Keńesti etnomádenı birlestik basshylarynan qalypastyrý kózdelip otyr. Sonymen birge Assambleıa Keńesine qoǵamdyq nagradalardy taǵaıyndaý quzyreti qarastyryldy», - dedi vıtse-mınıstr.

Aıta keteıik, qoldanystaǵy Zańǵa sáıkes, Assambleıa Tóraǵasynyń orynbasarlaryn Prezıdent taǵaıyndaıtyn bolatyn. Al osy joba aıasynda Tóraǵa orynbasarlaryn rotatsııalaý ustanymymen taǵaıyndaýdy aıqyndalyp otyr.

Óz kezeginde senator Baqytjan Jumaǵulov júıeli jumystardy oryndaýda QHA róli zor ekenin jáne oǵan úlken jaýapkershilik júkteletinin atap ótti.

«Sondyqtan jańa talaptarǵa sáıkes, Assambleıa qyzmetin zańnamalyq túrde jetildirý - obektıvti qajettilik. Qarastyrylyp otyrǵan zań jobasy dál osy maqsattardy kózdeıdi. Osy oraıda qujattaǵy eń mańyzdy baǵyttaryna toqtalsaq, birinshiden, QHA-nyń atqaratyn qyzmet salasy men jaýapkershiligin arttyrý eskerilgen. Ol endi tek etnosaralyq qarym-qatynastarǵa ǵana emes, sonymen qatar qoǵamdyq kelisim men jalpyulttyq birlikti qamtamasyz etýge de qoldanylatyn bolady. Bul - túbegeıli ózgeris. Sonymen qatar, Assambleıa músheleriniń jumysy zańdy túrde kúsheıtiledi, olardyń quqyqtary men mindetteri naqtylanyp, bekitiledi», - dedi B. Jumaǵulov.

Komıtet músheleri zań jobasyn Senattyń jalpy otyrysyna shyǵarýǵa biraýyzdan kelisti.