Qazaqstan halqy Assambleıasynyń ınstıtýtsıonaldyq rólin kúsheıtetin zań qabyldandy - Senat
Atalǵan Zań Elbasy N.Nazarbaevtyń «Nur Otan» partııasynyń XVI sezinde jáne Qazaqstan halqy Assambleıasynyń XXII sessııasynda bergen tapsyrmalaryn iske asyrýǵa baǵyttalady. Osyǵan oraı, eldegi qoǵamdyq-saıası turaqtylyq jáne etnosaralyq qatynastar salasynda qoldanystaǵy zańnamany jetildirý usynylǵan.
«Qazaqstandaǵy qoǵamdyq kelisim úlgisi álem elderinde keńinen moıyndalyp jatqany belgili. Osy turǵyda etnosaralyq kelisim men birliktiń ınstıtýty bolyp tabylatyn Qazaqstan halqy Assambleıasynyń róli joǵary. Al talqylanyp otyrǵan qujat qazaqstandyq patrıotızmdi nyǵaıtý boıynsha Ult josparynyń «Birtektilik pen birlik» atty tórtinshi baǵytyn iske asyrýǵa baǵyttalady», - dedi QR Mádenıet jáne sport mınıstri Arystanbek Muhamedıuly.
Onyń aıtýynsha, qujat arqyly Qazaqstan halqy Assambleıasynyń ınstıtýtsıonaldyq rólin kúsheıtetin, qazaqstandyqtardyń qoǵamdyq kelisimi men ulttyq birligin nyǵaıtý úshin jaǵdaılar jasaıtyn, «Máńgilik El» birikken jalpyulttyq patrıottyq ıdeıalar negizinde búkil qazaqstandyq azamattyq birdeılikti jáne básekege qabiletti ultty qalyptastyrýǵa yqpal etetin ózgerister engizilgen.
«Sonymen qatar, engiziletin ózgerister eń birinshi kezekte «Máńgilik El» jalpyulttyq patrıottyq ıdeıasyna qatysty bolyp tabylady. Bul rette birtutas memlekettik saıasatty qalyptastyrýǵa arnalǵan normatıvtik-quqyqtyq negiz qurý kózdeledi», - dedi mınıstr. Onyń sózine qaraǵanda, atalǵan zań QHA ınstıtýtsıonaldyq rólin kúsheıtip, «Máńgilik El» ıdeıasyna ortaq barlyq qundylyqtar negizinde qoǵamdyq kelisim, qazaqstandyq birtektilik pen birdeılikti nyǵaıtýǵa jaǵdaı jasaıdy.