Qazaqstan halqy Assambleıasynda jas basqarýshylar korpýsy paıda bolady

ASTANA. QazAqparat -Qazaqstan halqy Assambleıasy tóraǵasynyń orynbasary - Hatshylyq meńgerýshisi Leonıd Prokopenko QR Prezıdenti Joldaýyna baılanysty iske asyrylatyn jańa mindetterdi jarııalady, dep habarlaıdy QazAqparat.

Búgin QHA Keńesiniń keńeıtilgen otyrysynda Memleket basshysy Joldaý kezinde 2019 jyldy «Jastar jyly» dep jarııalaǵanyn, osyǵan oraı QHA tarapy bul baǵytta tıisti sharalardy atqaratyndyǵy aıtyldy. 

‪«Prezıdent belgilegen maqsattardy eskere otyryp, «Jańǵyrý joly» respýblıkalyq jastar qozǵalysy 2019 jylǵa damýdyń jol kartasyn qurýy tıis. Áleýmettik lıftilerdiń keń tuǵyrnamasyn qurý - ol QHA-nyń barlyq qurylymdarynyń mindeti. Sondyqtan da árbir etnomádenı birlestiktiń, QHA-nyń respýblıkalyq ári óńirlik qurylymdary jetekshilerinde jastar saıasaty jónindegi orynbasary bolýy kerek. Olar negizinen bizdiń jastardyń arasynan iriktelýi qajet. Bul máselege qatysty tapsyrmany oryndaýdy uzaqqa sozýdyń reti joq dep oılaımyn. Jaqyn arada QHA-nyń jastar-basqarýshylyq korpýsyn qalyptastyramyz. Osy oraıda jastar úshin áleýmettik lıftini qura otyryp, ony ary qaraı ilgeriletemiz», - dedi L. Prokopenko.

Sonymen qatar ol Assambleıa Joldaý júktegen mindetterdi el halqyna túsindirýge jumyldyrylatynyn atap ótti.

Budan buryn habarlanǵandaı, QHA Keńesiniń keńeıtilgen otyrysynda Leonıd Prokopenko Elbasy áleýmettik jaýapty memlekettiń saıasatyn dáıekti túrde júrgizip jatqanyn málim etti.

‪